La llingua asturiana suena en Bruseles

Iniciativa pol Asturianu ta acabante anunciar que’l so programa radiofónicu “sigue sumando emisores peles que se radia”. Dempués de lo que califiquen como “ésitu de la primer edición del programa”, que yá s’emite en Radio Sele, AllerFM y Radio Ujo, agora súmase a esti llistáu Radio Alma, emisora multillingüe de Bruseles, capital de Bélxica, onde va poder sentise’l programa d’esta organización.

Radio Alma, emisora fundada en 1978 pa la emigración presente na ciudá, n’especial de llatinoamérica y el sur d’Europa, emite en tola contorna de Bruseles al traviés del 101.9 de la FM, amás de pa tol mundu al traviés de la so páxina web. Dende la dirección del programa muéstrense satisfechos porque “l’asturianu y les noticies sobre la reivindicación llingüística van llegar agora a los miles d’asturianos que viven na capital europea”.

“Iniciativa pol Asturianu nes ondes” ta dirixíu por Samuel Gradín, llocutor con llargos años d’esperiencia en medios como La Voz de Galicia o la RPA. A lo llargo de los alredor de sesenta minutos que dura la emisión de cada mes hai tiempu pa conocer les noticies del movimientu de reivindicación llingüística, entrevistes, música y hasta un pequeñu espaciu pa deprender asturianu.

Sentir el primer programa d’Iniciativa pol Asturianu nes ondes