La industria cultural pide nun votar al PP si caltien l’IVA del sector

Les asociaciones del ámbitu de la industria cultural, amás de la so tradicional quexa contra l’IVA, faen una amenaza directa a los populares.

Les principales asociaciones profesionales del cine, la música y el teatru celebraron esti día un alcuentru nel que pidieron al Gobiernu que sala de los comicios del 20 D una rebaxa del IVA cultural dende’l 21% impuestu en 2012 pol Executivu del PP.

Pero, amás de la so tradicional quexa contra un impuestu sangrante”, la cita rexistró una tayante novedá: una amenaza directa a los populares. “Solo hai un partíu que nun introduz esi amenorgamientu nel so programa electoral. Y quien nun atiende a les nueses reivindicaciones nun merez los nuesos votos”, aseguró Jesús Cimarro, presidente de FAETEDA (Federación Estatal d’Asociaciones d’Empreses de Teatru y Danza).

La industria cultural emplega a 485.000 persones n’España, según datos del Ministeriu d’Educación, Cultura y Deporte: a saber cuántos d’ellos sumaránse a esti boicó a los populares nes urnes.

La industria lleva años pidiendo reiteradamente y en baldre una xunta col presidente del Gobiernu, Mariano Rajoy. Les formaciones con opción de llegar a la presidencia, los socialistes y Podemos plantegen un IVA amenorgáu del 10% pa les artes, anque’l partíu de Pedro Sánchez tamién propón intentar harmonizar l’impuestu a nivel européu y baxalo hasta’l 4%. Ciudadanos quier amenorgar el IVA cultural hasta’l 7%, la menor de los dos categoríes a les que pretende llindar l’impuestu.