La potencia sonora del rock escandinavu llanza’l nuevu ciclu de Factoría Sound

Tragos dulzuxos de rock sureñu -del sur d’EEXX-, aires glam y sicodélicos, tintes progresivos, un pocu de folk, un enforma de guitarreo, toques de blues, una plizca de ABBA -por daqué son suecos-… Son dellos ingredientes colos que Hellsingland Underground va empecipiar a toa potencia’l nuevu ciclu de la Factoría Sound. Esti vienres 21 d’abril, a les 21 hores dende la sala escénica de la Factoría Cultural d’Avilés.

Llueñe de encasillase, la banda que lidera’l multifacéticu Charlie Granberg, fuxendo d’etiquetes define lo suyo como rock norteño, llegáu casi dende’l círculu polar. Un Granberg conocíu n’Avilés pol so mural graffitero de la plaza del Pexe realizáu nel primera Focart (2021), nel que tamién ufiertó la so música, en menor formatu naquella ocasión. Diéron-y forma nel so propiu estudiu de grabación, montáu al llegar la pandemia n’una vieya carpintería a la que bautizaron Hellquarters. Anubiertos d’un optimismu rampante, con cambéu de baterista pol mediu, roblen un álbum que confirma’l maduror y l’estáu de gracia de la banda, unos suecos barbudos qu’esfruten de lo que faen y arimen al públicu en directos estelantes.

Hellsingland Underground fai gala de les sos voces y melodíes nuna esplosiva colección de cantares que va faer esfrutar al públicu incondicional de la Factoría, santu y seña de la música d’Asturies, onde esfrutar de les más atrayentes actuaciones de rock del norte.

Les entraes, a 10 euros, 12 el día del conciertu, pueden adquirise nes canales habituales, la web https://uniticket.janto.es/palaciovaldes/ y la taquilla de la Casa de Cultura. Tamién s’atopa disponible l’abonu para los trés recitales del nuevu ciclu hasta xunu, que completen Theo Lawrence y la so banda, amás de los Handsome Jack, con un descuentu del 25 per cientu (22,50 euros).