La Confederación de STEs ya IX recurren la reválida

Nel casu de la reválida de Sestu que ye noticia nestos díes, la Confederación de STEs, na que s’integra SUATEA, vien acabante decidir recurrir los cuestionarios de contestu, al tiempu qu’Izquierda Xunida denuncia esti día’l “maquillaxe electoralista” del PP coles reválides que contempla la LOMCE pa “caltener na práctica la filosofía segregadora” de la llei.

Enrique Díez, coordinador de la Área Federal d’Educación d’IX, alvierte nuna nota de prensa asoleyada esti xueves que “esta maniobra electoral contempla tratar de consiguir un futuru pactu neolliberal con el conservadores de Ciudadanos”.

Izquierda Xunida, al traviés de la so Área Federal d’Educación, denuncia’l “maquillaxe electoralista” puestu en marcha pol Gobiernu en funciones del PP coles reválides que contempla la Llei Orgánica pa la Meyora de la Calidá Educativa (LOMCE) pa “caltener na práctica la filosofía segregadora d’esta contrarreforma educativa”. Enrique Díez, coordinador d’esta área d’IX, alvierte de que “frente a los ocho comunidaes autónomes ‘insumises’ a la LOMCE y ante el refugu mayoritariu de la comunidá educativa y de los espertos, el partíu de Mariano Rajoy opta por ponese en manera electoral y asemeyar que recula nesti delicáu asuntu”.

Pa Izquierda Xunida ye falso que con estes pruebes estandarizaes y el so control burocráticu de les práctiques escolares y l’oficiu docente vaigan alzase les resultancies educatives: “el fechu de que’l ministru Méndez de Vigo y el so equipu plantegen agora que les reválides pierdan parte del so calter centralista y uniformizador, amás d’aceptar nun faer públiques les sos resultancies, nun significa que variara la filosofía qu’anima esti tipu de pruebes. En realidá namái sirven pa fomentar un aprendizaxe memorísticu y descontestualizáu, que ye l’únicu que llogren midir”.

Enrique Díez repostia que “les reválides busquen n’última instancia identificar, etiquetar y escoyer al alumnáu que tien problemes d’aprendizaxe de cara a la so futura selección definitiva na secundaria. Nello inflúi’l retayu de sofitos y recursos qu’acompaña a la LOMCE, cifráu yá en cerca de 8.000 millones d’euros”.