Kings of Leon, Alt-J y Belle & Sebastian van actuar nel Mad Cool 2017

La segunda edición del festival Mad Cool, que va tener llugar en Madrid del 6 al 8 de xunetu, anunció esti miércoles la segunda riola d’artistes que s’incorporen a la so programación, cola banda estadounidense Kings of Leon como nueva cabeza de cartelu.

Nuna nota de prensa tamién se desveló que la cita madrilana va cuntar col grupu inglés Alt-J, ganadores del prestixosu premiu Mercury al meyor discu británicu de 2012 por An awesome wave, y col toque más pop de los escoceses Belle & Sebastian.

Ente les novedaes del cartelu, apaecen otros dos nomes menos conocíos: los tamién ingleses Wolf Alice, banda emerxente que conxuga grunge y indie rock y que foi nomada al Grammy a la meyor actuación rock de 2016, o’l productor y músicu estadounidense d’electrónica Travis Steward, más conocíu como Machinedrum. D’esta miente, especialmente con Kings of Leon, ganadores de cuatro premio Grammy con siete disco d’estudiu (el postreru, Walls, acabante publicar), refuérzase’l tonu roqueru de la próxima edición del festival, que tamién va cuntar, como yá fuera anunciáu, con Green Day y Foo Fighters.

En total van ser más de 60 artistes los que conformen el cartelu de la segunda edición d’esti gran eventu musical, que volverá celebrase nos terrenes de La Caxa Máxica y que nos III Premios Fest foi galardonáu como “festival revelación”.