LALUDIKATECA tien un gran ésitu ente’l públicu

El programa de la Universidá Popular de Xixón estrenase con llenu de públicu, tres trés selmanes de funcionamientu de les nueves actividaes pa realizar en familia.

Yá trescurrieron tres fines de selmana desque empezaren les primeres actividaes del nuevu programa LaLudikateca. Y atopense en marcha los talleres: ¿Baillamos?, Atrevémonos cola bici y Cocinamos n’equipu, con un desenvolvimientu que se fai a lo llargo de delles fines de selmana.

El pasáu sábadu Siempres quixi faer cerámica y Fotografía ente dos añediéronse al calendariu inicial previstu dada la demanda. Tratase d’actividaes de tres hores de duración continues que nun precisen más qu’una sesión.

LaLudikateca ye un programa en que’l so diseñu busca que distintes xeneraciones alleguen xuntes a la mesma actividá pa compartir esperiencies qu’otra manera nun podríen tener llugar. Un güelu puede allegase cola so nieta a faer cerámica, una familia completa puede aprender a remanar un planisferiu ya identifica rconstelaciones, una tía y el so sobrín, col so cámara de semeyes, van trabayar n’equipu pa llograr instantánees; entemecer ingredientes pa faer un bizcuechu va poder dexar qu’una madre y el so fíu faigan per primer vegada una receta de cocina, zúquense los deos y oyan charrar sobre distintos formes d’alimentación. A falta de carné de conducir bicicletes, qué meyor que poder aprender la técnica de montar en bici, la teoría, y les nueves posibilidaes que nos brinda la bicicleta como mediu de tresporte urbanu. Y, ¿por qué nun baillar? La sida de nun puedo baillar porque se me da bien mal puede trate albortada si un vecín de pocu tiempu persuádenos para, da-y al cuerpu la oportunidá d’aprender a relaxase y a movese afayando xuntos un nuevu filón de posibilidaes.

Y non setrata de talleres infantiles sinón familiares o d’amistá nos que siempres se deberán matricular, siquier, una persona adulta y otra n’edá infantil.

Les seis actividaes realicense en distintos centros municipales repartíos per Xixón: el Centru de Cultura Antiguu Institutu, el Centru Municipal Integráu d’El Llanu, el taller de cerámica de la UP nel Parque d’El Lloredal, los esteriores y rampla d’accesu al Pabellón de Deportes de La Guía y nel Muséu Casa Natal de Xovellanos y la so redolada.