Javier Bauluz amuesa la traxedia d’anguaño nel Centru Niemeyer

Dende principios d’agostu de 2015, y mientres cuatro meses sobre’l terrén, la cámara del fotoperiodista Javier Bauluz acompañó a les madres, padres y fíos abellugaos en busca d’un llugar seguru pa vivir mientres el so llargu viaxe escontra’l corazón d’Europa.

El percorríu parte de la llegada a les isles de Lesbos y Kos, en Grecia, onde les persones abellugaes desembarquen tres un curtiu y peligrosu viaxe pel mar Exéu dende les mariñes de Turquía. Una vegada na Europa continental el viaxe de les families siries, iraquines, afganes ya iranines, principalmente, continua al traviés de Grecia, Macedonia, Serbia, Hungría, Austria, Alemaña, Holanda y Francia. Un llargu y duru camín que faen a cuerpu siguiendo les víes del tren, per caminos, autopistes, en buses o a bordu de los obsoletos y vieyos ferrocarriles de los Balcanes.

Javier Bauluz (1960, España) ye Premiu Pulitzer en Periodismu en 1995 y Premio Periodismu y Derechos Humanos 2008, ente otros. Ye tamién fundador y director de Periodismu Humanu, un mediu dixital con enfoque de Derechos Humanos nacíu en 2010. Trabayó p’axencies como Associated Press, Reuters, Staff y publicáu en diverses revistes y diarios internacionales como The New York Times, El País, Magacín La Vanguardia, Periodismu Humanu, El Mundu, Time, ect.. Cubrió les guerres de Centroamérica de finales de los años ochenta, los últimos años de Pinochet nel poder, la Primera Intifada palestina, la guerra de Bosnia, la crisis de Ruanda y l’inmigración escontra España y Europa dende 1996, y reportaxes y documentales en Llatinoamérica, África y Oriente Próximu. Ponente en seminarios nacionales ya internacionales y profesor en IE University y otres universidaes, ye’l director del Alcuentru Internacional de Semeya y Periodismu de Xixón dende 1997 ya impulsor del Manifiestu sobre Periodismu y Derechos Humanos en 2008.