IX pide medrar 110 millones y sofitar la Universidá en I+D+I

Izquierda Xunida va proponer a la FSA una medría del presupuestu global d’Asturies pa 2014 de 110 millones d’euros, colos que pretenden encetase llínees especiales d’intervención pa la reactivación económica y dar respuesta a les persones en riesgu d’esclusión social. N’I+D+i , los planteamientos d’Izquierda Xunida diverxen de los de la FSA: “nun creemos la propuesta del modelu que se ta plantegando pola Conseyería d’Economía. Apuesten pola empresa, nós pola Universidá”, esclarió González Orviz, quien añedió que ye precisamente la Universidá quien abandera n’Asturies la investigación.

IX va presentar al PSOE esta propuesta güei llunes camentando la so inclusión como indispensable pa qu’IX pueda emprestar sofitu al presupuestu de 2014. Los planteamientos d’Izquierda Xunida tán estrechamente rellacionaos cola situación de recesión económica y col refugu a les respuestes daes hasta la fecha tantu pol PSOE como pol PP.

Al respective de les midíes en gastu tienen de “partir del presupuestos de 2013”. En Salariu social la propuesta ye amontar la partida a 94 millones d’euros qu’incluyiríen la revisión de la cuantía según l’IPC –lleva tres año conxeláu-, y un novedosu bonu social pa evitar la probeza enerxética”. Trataríase d’un complementu de 30 euros mensuales pa contribuyir nos costos d’agua, lluz y calefacción.

Amás, plantégase una revisión de los procedimientos de reconocencia de la prestación de forma que los beneficiarios que salgan del sistema, por atopar un emplegu que nun xenere contraprestación puedan reincorporase de forma automática.

Los planteamientos d’IX inclúin midíes de reactivación económica. Asina, pa planes d’empléu propónense 15 millones d’euros adicionales que dexaríen 1.000 contratos más de los previstos na propuesta socialista. “Tamos falando d’amontar la protección y cobertoria de 46.000 persones que nesti momentu nun reciben nengún tipu de prestación.

N’I+D+i , los planteamientos d’Izquierda Xunida diverxen de los de la FSA: “nun creemos la propuesta del modelu que se ta plantegando pola Conseyería d’Economía. Apuesten pola empresa, nós pola Universidá”, esclarió González Orviz, quien añedió que ye precisamente la Universidá quien abandera n’Asturies la investigación. “Por eso plantegamos una medría de 15 millones pa planes d’investigación y pa gastu corriente de la Universidá de forma que, de primeres, déxe-y sobrevivir dempués de los axustes que fixo, segundu, caltener proyectos en cursu y, en tercer llugar recuperar investigadores y proyectos que por falta de financiamientu nesti momentu paráronse”.

En Mediu Rural, tamién se plantega una intervención vía presupuestos pa garantizar la so viabilidá futura. Nesti sentíu, el coordinador xeneral d’IX señaló que los efectos del gastu públicu son bien importantes dende la perspectiva del desenvolvimientu de zones desfavorecidas. Les llínees d’intervención pasen por incorporar xente nuevo al mediu rural, modernización d’esplotaciones, contratu territorial d’esplotación y ayudes agroambientales. “Plantegamos daqué tan revolucionariu como caltener el presupuestu de 2013, y que yá vimos que lo trata de retayar nel orde de 7,5 millones”, afirmó. Otres midíes son desaniciar los efectos de la eliminación de los subsidios estatales a la vivienda y qu’algamen los 50/60 euros per mes y familia. “Nun plantegamos que con calter xeneral aplíquese, pero si plantegamos qu’hai qu’ayudar a munches families que taben nesa situación, compensando la subsidiación que l’Estáu retirólos”. Nel mesmu sector, para IX ye una prioridá la rehabilitación del parque de viviendes públicu d’Asturies y que daríen respuesta a les necesidaes de families que fueron desanunciaes, ente otres. Nel ámbitu municipal, reclámase la recuperación del fondu incondicionado pa los Conceyos, con una partida de 8,5 millones d’euros. El coordinador d’IX sollertó amás de la llei de reforma de l’alministración local y que va suponer dexar desoyíes prestaciones qu’agora son asumíes polos Conceyos, como les ayudes a l’alimentación o la rede d’escueles de 0 a 3 que, na so opinión, tendría d’asumir la Comunidá Autónoma.