Iniciativa pol Asturianu pide a los partíos políticos qu’usen l’asturianu na campaña pal 25-M

La organización Iniciativa pol Asturianu acaba de facer llegar a toles formaciones polítiques que se presenten a les elecciones a la Xunta Xeneral, una carta na que-yos soliciten l’usu del asturianu na campaña electoral viniente, de cara a les elecciones del 25 de marzu. Na carta la organización esplica a los partíos la necesidá de da-y presencia pública al asturianu dende l’ámbitu políticu, yá que, espliquen “nun se puede dar la espalda al idioma del pueblu al que se quier llevar a les urnes”.

L’asturianu, como elementu patrimonial de tolos asturianos ha tenese en cuenta a la hora de dirixise a ellos, recuerden, “tanto dende les instituciones públiques, como dende les privaes”, y ye por ello que piden a les fuercies polítiques qu’usen l’asturianu nos sos anuncios electorales en valles, televisión, radio, redes sociales, amás de nes intervenciones públiques de los sos llíderes.

Dende Iniciativa pol Asturianu espliquen que nun ye la primer vegada que partíos políticos usen l’asturianu en campaña, y piden agora “que se dea normalidá a la nuesa llingua nel procesu electoral, pues esta ha ser patrimoniu de toos”, recordando amás a les fuercies polítiques, que les encuestes sociollingüístiques recueyen la voluntá de los asturianos de que los sos políticos s’espresen, polo menos dacuando, na nuesa llingua.

El programa de política llingüística

Na mesma carta, Iniciativa pol Asturianu pidió a los partíos políticos “qu’incluyan midíes más ambicioses pa normalizar l’asturianu”, recordando qu’hai munches posibilidaes pa facelo ensin qu’esto suponga nengún gastu pa l’alministración.

Amás, recordóse-yos a les fuercies polítiques, que l’estatus d’oficialidá, “si bien nun ye una solución definitiva pal idioma d’Asturies, ye imprescindible p’asegurar el futuru del asturianu”. Iniciativa pol Asturianu ufrió tamién nesa carta’l so asesoramientu pa dambes cuestiones.