Iniciativa pol Asturianu critica’l “legáu” de la conseyera Ana González “al llau de los que destruyen la llingua”

Iniciativa pol Asturianu critica’l “legáu” de la conseyera Ana González asitiándola “al llau de los que destruyen la llingua asturiana”. L’asociación amuésase convencida de que “el llabor de les persones conozse pol so legáu, lo que dexen al so pasu peles responsabilidaes qu’ocupen” y la Conseyera d’Educación y Cultura nos caberos trés años de llexislatura, la socialista Ana González, “siempres tien mui bones pallabres pa col asturianu y dende qu’entró nel so cargu fizo munches promeses (solucionar el problema del profesoráu de Llingua Asturiana, dar pasos alantre na normalización del idioma, avanzar nel procesu d’oficialización de la toponimia, etc.)”, pero “güei, cuando la llexislatura ta terminando, podemos afirmar que’l legáu de la Conseyera ye una llaceria, una riestra de pasos atrás que lleven al asturianu a una situación peor entá de la que tenía cuando ella ocupó’l so cargu en 2012”.

Iniciativa pol Asturianu asoleyó estos díes una nota na que fai balance del papel del la Conseyera d’Educación y Cultura pa cola llingua asturiana y, por exemplu, nel ámbitu educativu, atalanta que “el profesoráu sigue ensin tener normalizada la so situación. Esta foi una de les sos promeses más clares, reconocer la especialidá d’asturianu al profesoráu, agora que los sos estudios tán homologaos dafechu colos del restu d’especialidaes docentes. Siguimos esperando, mientres ella pon escuses y echa la culpa a Madrid, pero nun se presenta a los conceyos col Ministeriu d’Educación, mandando a cargos inferiores mientres ella viaxa a Nueva York”.

Como nun-y paecía abondo con ello, “tuvo que dar pasos atrás en tol sistema educativu. De mano, faciendo que l’asignatura d’asturianu tuviera de competir con Cultura Asturiana en Primaria (incumpliendo la Llei, qu’establez que tien de ser asignatura voluntaria, non optativa), dempués recortando nun 75% la presencia de Llingua Asturiana nel ciclu de Bachilleratu, de 4 a 1 hora selmanal”, quieren dexar afitao dende Iniciativa. No que cinca al Plan de Normalización, les coses entá-yos paecen pior: “d’eso nin se fala nin s’espera d’ella que lu eche alantre. La so política foi la d’afogar a les poques y pequeñes editoriales que queden editando n’asturianu con abusives condiciones y costoses xestiones pa poder algamar les probetayes ayudes a la edición”.

Y nel campu de la toponimia, “los primeros pasos atrás son obra d’esta Conseyera, cediendo a les presiones de los medios de comunicación más enemigos del idioma d’Asturies. Con ella dellos topónimos que se recuperaren pa nun perdelos, volvieron con decretos del BOPA a la so versión deturpada. D’avances nesti campu nin falamos tampoco. La Xunta de Toponimia parada y l’usu de la toponimia oficial dende la so Conseyería, desastrosu”.

Por too ello pa Iniciativa pol Asturianu el legáu de la Sra. Conseyera al frente de la Política Llingüística d’Asturies, define’l so papel na hestoria, “nel llau de los qu’ayuden a la destrucción d’esta llingua, col sofitu absolutu del so partíu y del gobiernu del Sr. Javier Fernández”.