Portada Fiestes Iniciativa pol Asturianu amuesa’l so descontentu cola falta d’usu de la toponimia oficial y l’asturianu en Xixón

Iniciativa pol Asturianu amuesa’l so descontentu cola falta d’usu de la toponimia oficial y l’asturianu en Xixón

by asturnet

Iniciativa pol Asturianu fizo llegar al conceyal responsable de les competencies de política llingüística en Xixón, el Conceyal de Cultura, Educación y Fiestes, Carlos Rubiera, el so descontentu por delles cuestiones específiques alredor del usu del asturianu per parte del Conceyu de Xixón. Ente les cuestiones destacaes, y espuestes énte’l Conceyal nel caberu Conseyu Asesor de la Llingua Asturiana, tán la marcha atrás n’EMTUSA nel usu de la toponimia oficial nes cabeceres de los autobuses y paraes de los mesmos, onde topónimos oficiales como “El Cerilleru” o “Xove” y formes como “Feria Muestres” desapaecieron volviendo a apaecer les formes castellanizaes que yá nun son oficiales.

Iniciativa pol Asturianu presentó una protesta énte EMTUSA esplicando esta cuestión na que soliciten a la empresa que se recupere l’usu normal de la toponimia oficial y onde se recuerda qu’esta empresa pública foi puntera siempres nel usu del asturianu, apaeciendo dientro de los autobuses tola cartelería billingüe dende va años, y esperando que nun se dean pasos atrás nesi sen.

Per otru llau, Iniciativa pol Asturianu atopó otru casu llamativu de pasos atrás pal usu del asturianu y la toponimia. El certame “Xixón de sidra”, qu’esti añu dexa nel so llogotipu nun tamañu ínfimu la forma “Xixón”, a favor de “Gijón”, cuando non la fai desapaecer, como ocurre nos toneles instalaos en tola ciudá. L’usu del asturianu nun campu siempres tan apegáu al nuesu idioma ye “inesplicable” pa la organización de reivindicación llingüística. Y soliciten a les conceyalíes responsables, la de Turismu y la de Cultura, qu’organicen esti eventu, amás de la empresa contratada, Fenicia Marketing Gourmet, “que tengan en cuenta l’usu del asturianu nesta y en futures ediciones, poniéndonos a la so disposición pal asesoramientu nesta cuestión”.

Son estos dos exemplos cercanos qu’amuesen lo que pa Iniciativa pol Asturianu ye “un xeneral ya importante pasu atrás en tola actividá del Conceyu de Xixón” que valoren de forma mui negativa, “pues yá cola anterior alministración veníen produciéndose munches deficiencies nel usu de la toponimia oficial de Xixón, aprobada yá en 2006, y del asturianu, que ta estancáu, cuando non cada vegada más marxináu”.

Soliciten al Conceyu de Xixón “qu’efectúen un usu continuu del asturianu nes sos actividaes”. “L’usu del asturianu nos cartelos de toles actividaes del conceyu, na publicidá, etc. nun supón gastu estra nengún pa les arques del Conceyu, yá que la torna pue facese na so propia Oficina de Normalización Llingüística, y la impresión d’una sola versión billingüe nun xenera gastu estra”, espliquen. Amás recuerden qu'”usar l’asturianu xenera un arrequecimientu social y cultural pa una ciudá onde ye la llingua d’una parte importante de la población y seña d’identidá de tolos xixoneses y asturianos”.

Tamién te podria gustar