Humberto Gonzali nomáu asesor del grupu municipal del Partíu Popular de Xixón

Hai dellos díes el Partíu Popular nomó al escritor y xestor cultural Humberto Gonzali asesor del grupu municipal xixonés. Gonzali, que ye collaborador d’AsturnewsOpinión va exercer los sos servicios como Xefe Técnicu coles funciones d’asesoramientu de los conceyales d’esta fuercia política nel periodu corporativu 2007-2011.

Humberto Gonzali ye miembru de la Xunta Directiva del PP de Xixón, amás de presidir la Comisión de Cooperación y Solidaridá. En representación d’esti partíu ye componente tamién de la Xunta Rectora de la Fundación Municipal de Cultura, Educación y Universidá Poular de Xixón, y Miembru de Númberu nel RIDEA, onde yá anunció una importante propuesta que va llevar alantre nos meses vinientes.

D’otra parte ye tamién el presidente del Círculu Lliberal y coordinador de l’Asociación d’Escritores Asturianos. Como xestor cultural tien desarrollao numberoses actividaes, siendo l’entamador del foru lliterariu Arribada. Ye ún de los escritores más destacaos d’Asturies. Tien publicaos nueve poemarios, dos volúmenes de narrativa, traducciones dende’l catalán y francés, y numberosa obra en más d’una ventena de llibros colectivos.