Humberto Gonzali, militante asturianista de referencia en el PP asturianu, dase de baxa

Nuna decisión sorprendente, depués de munchos años de militancia y de referencia nel asturianismu de centru-derecha, Humberto Gonzali asoleyaba esta fin de selmana la so decisión de dase de baxa del PP. “Güei solicité’l términu pa la mio condición d’afiliáu al Partíu Popular”, escribía’l sábadu nun comunicáu nel que tamién daba les razones de la so baxa: “El Partíu Popular, n’Asturies y en Xixón, perdecidióse por un proceder que lu allueña pasu ente pasu d’esi lliberalismu social, de progresu y asturianista, fondamente democráticu, que non pocos militantes díbemos propugnando”.

Esta baxa llega tres d’una trayectoria “d’apueste por una vía política qu’entamara en 1994 en faciendo públicu’l mio venceyamientu al proyectu popular, y que siguió con mayor intensidá nel conceyu de Xixón onde como militante de l’agrupación local, dende 2004, trabayé con discreción, compromisu y llealtá”.

Sigún desplica Gonzali, foi un tiempu de facer políticu apináu, como toa obra humana, de satisfacciones y desaliendu, de llogros que pusieron en valir l’emperru nos principios y d’esfuerzos balderos o apostalgaos. Foi un tiempu de convivencia nun partíu que me dexa amigos y la conocencia de persones válides y preparaes enforma pa la xestión de los intereses xenerales. Y foi, tamién, tiempu onde les faltes d’una estructura política y el nun s’afacer a la realidá social espeyáronse de toes toes de manera repetida. Soi lliberal y soi asturianu y, poro, creo dafechu que la democracia ye l’espaciu natural del lliberalismu, y que l’amor a tolo que na nuestra tierra pue defininos como lo que somos ye la esencia del asturianismu”.

Humberto Gonzali nun pue ser más claru na so renuncia: “El Partíu Popular, n’Asturies y en Xixón, perdecidióse por un proceder que lu allueña pasu ente pasu d’esi lliberalismu social, de progresu y asturianista, fondamente democráticu, que non pocos militantes díbemos propugnando. Y non, nun me ye posible, entós, ser lliberal refugando la democracia nin asturianu despreciando al asturianismu”.

Por mor d’ello, esti sabado, Gonzali formalizaba la baxa “nun Partíu Popular al que-y deseyo lo meyor, al pesar de que n’Asturies nun pudiera o nun quixera, como sí quixo y pudo n’otros llugares, ser referente de los que n’amor a la patria primera dedíquen-y a ésta pal so progresu los más grandes enfotos. A ellos, a nós, que de guía tengamos aquella frase del prócer xixonés Gaspar Melchor de Xovellanos; Almiro al que defende la verdá y sacrifícase poles sos idees, pero non a los que sacrifiquen a otros poles sos idees”.

Humberto Gonzali nació en Figareo, Mieres, en 196 y ye un escritor asturianu que foi miembru de l’asociación Conceyu Bable y profesor de llingua asturiana. En 1985 yera nomáu secretariu de la Xunta pola Defensa de la Llingua Asturiana, onde coordinó numberoses acciones de protesta pola denegación de derechos llingüísticos, destacando les promovíes ante la sanción al factor de FEVE de Nava por usar la toponimia tradicional. Xunto con Juan Bonifacio Lorenzo Benavente y Xicu Monteserín fundaba en 1988 Orbayando, revista asturiana d’información, que codirixó hasta l’añu 1990.

Nel 1990 creó con otros autores asturianos l’asociación Escritores y Traductores en Llingua Asturiana (ETLLA) de la que foi’l so presidente. Promovió la IV Xunta d’Escritores Asturianos celebrada en Villaviciosa en 1996, y promovió y foi’l coordinador de la V Xunta d’Escritores Asturianos fecha en Lluanco en 1998. En 2006 crea l’Arribada, foru de lliteratura qu’impulsa nel conceyu de Xixón.