Estudiantes de la universidá de Leiden participen nel programa “Conoz los tos parques” d’Uviéu

Cuatro estudiantes de la Universidá de Leiden, n’Holanda, atoparon n’Uviéu estudiando, mientres dos selmanes, el modelu de xestión, puesta en valor y visites del programa “Conoz los tos parques”, puestu en marcha pola conceyalía de Parques y Xardinos del Conceyu d’Uviéu.

En concretu, los estudiantes analizaron la puesta en valor de los parques de La Zoreda, la ruta de fortificaciones de la guerra civil nel Naranco y l’apertura a visites empuestes del parque de La Rodriga, incluyendo la realización d’una escavación arqueolóxica visitable en dichu parque.

Igualmente, los estudiantes Tim Odermatt, Fiona Hart, Jildau Habierkewicz y Douglas Indzonka, so la coordinación del arqueólogu Alfonso Fanjul Peraza, encargáu de les visites, participen de la escavación arqueolóxica del parque de La Rodriga, y lleven a cabu un estudiu de la percepción de los visitantes al respective de les rutes plantegaes.

El programa de visites empuestes gratuites a los parques históricos d’Uviéu faise tolos xueves y domingos hasta’l mes de setiembre incluyíu, colos siguientes horarios: 10.00 – La Rodriga. (Puntu d’alcuentru entrada Calle Campumanes), 12.00 La Zoreda (Puntu d’alcuentru parking esterior del restorán Castillo de La Zoreda), y 17.00 Fortificaciones del Naranco (Puntu d’alcuentru al pie de la estatua del Sagráu Corazón), nesti últimu casu con reserva previa al teléfonu 679079076.