Esti martes entamaron les matrícules na Universidá Popular de Xixón

Esta selmana abriose’l plazu d’inscripción nos cursos y talleres que componen la ufierta d’ochobre de la Universidá Popular de Xixón. Güei miércoles abrese’l plazu pa dellos cursos más y el xueves abrirase’l plazu de los caberos hasta’l día 29.

Como vien siendo habitual, la matrícula va facese de forma gradiada en trés díes, empezando’l martes 12 de setiembre la inscripción pa los cursos que se van impartir nel Centru de Cultura Antiguu Institutu, los museos Casa Natal de Xovellanos y Nicanor Piñole y les Aules de música, allugaes nel Antiguu Colexu Manuel Medina.

Esti miércoles 13 va abrise’l plazu pa los cursos programaos nel CMI de Pumarín Xixón Sur, el CMI Atenéu de La Calzada, el Colexu Públicu García Lorca y el Taller de Cerámica – Parque d’El Lloredal. Finalmente, quien deseyen realizar un cursu de los previstos nel Centru Comercial Leroy Merlin, el Centru Municipal d’El Natahoyo, el Muséu del Pueblu d’Asturies, el Centru Municipal de Vega – La Camocha, el CMI de L’Sable, el CMI d’El Cotu, l’Axencia Local de Promoción Económica y Empléu y el CMI d’El Llanu, van poder matriculase a partir del xueves 14 de setiembre.

La matrícula va permanecer abierta pa tolos cursos hasta’l vienres 29 de setiembre, pudiendo formalizase al traviés d’Internet -aportando a la plataforma de matrícula en http://up.gijon.es-, l’aplicación pa móvil igijon, faciendo usu de la rede de caxeros ciudadanos o de manera presencial en cualquier oficina d’atención a la ciudadanía. El llistáu d’oficines y los horarios d’apertura pueden consultase equí.

Pa inscribise nos cursos de la UP namái ye necesario ser mayor de 16 años y tener la tarxeta ciudadana de Xixón. Quien entá nun dispongan d’ella o desconozan el so númberu PIN pueden llograla de forma gratuita en cualesquier de les oficines o solicitala equí.