escenAvilés abre so homenaxe a Pardo Bazán col estrenu absolutu de “Cigarreres”

Esti trimestre, escenAvilés rinde’l so particular homenaxe a Emilia Pardo Bazán nel centenariu de la so muerte, con dos representaciones. Y la primera, l’estrenu absolutu nel Teatru Palacio Valdés de la versión en castellán de “Cigarreres”, adaptación de la so novela “La Tribuna” va ser esti vienres 11 de febreru, a les 20.15 hores.

Ye “Cigarreres” una obra afecha y empobinada pol dramaturgu Candido Pazó, y reivindica la figura de la escritora gallega, pionera del feminismu, tomando como puntu de partida una novela ambientada na Fábrica de Tabacos d’A Coruña nel segundu tramu del sieglu XIX, na que el trabayadores yeren mayoritariamente muyeres, y nun contestu d’españíu social que condució a la proclamación de la Primer República.

La trama encabezala una hestoria d’amor imposible entre una proletaria y un burgués, entre una trabayadora de la fábrica y un militar, y puede ser lleida como un testimoniu de la crisis qu’en 1868 llevó a la cayida de la dinastía borbónica y en 1873, de la mesma monarquía n’España.

La obra cunta con una repartida coral, con siete actrices qu’interpreten a seis trabayadores de la fábrica, seis cigarreres, y una más, que se pon na piel d’Emilia Pardo Bazán, como un personaxe más na trama. Elles son Tamara Canoxa, Susana Dans, Merce Castro, Isabel Naveira, Cuadonga Berdiñas, Ana Santos y Ledicia Sola, dalgunos de los nomes más reconocíos de la escena gallega.

Y too conduz a un espectáculu que conxuga’l tonu propiu d’un drama individual y colectivu como La Tribuna, con otros más frescos y llixeros, inclusive risibles por momentos, tan característicos de la narrativa de Pardo Bazán. Xuna escritora y xuna muyer que, como armes de defensa y ataque, recurría a asiduamente a la ironía, el sarcasmu y l’humor.