Entréguense los diplomes del I Cursu d’Asturianu del CUPA y l’Academia de la Llingua Asturiana

El Conceyu Universitariu pol Asturianu (CUPA) y l’Academia de la Llingua Asturiana (ALLA) dieron anuncia de la entrega de los diplomes acreitativos del I Cursu Básicu d’Asturianu del CUPA, que va celebrase esti miércoles 25 de mayu a partir de les 20 hores, nel Salón d’Actos del Conseyu de la Mocedá de Xixón (Avenida Manuel Llanez 68, baxu), cola participación de los alumnos, el profesor del cursu y un representante de l’Academia, que va dar los diplomes a los más de venti alumnos que participaron nel cursu y lleer dellos discursos. Amás va sacase la semeya de grupu de los alumnos que consiguen el diploma del cursu.

El CUPA valora “mui positivamente” esta esperiencia formativa qu’entamó en collaboración cola Academia de la Llingua Asturiana y la financiación de Caxa Rural y que, afirmen “tuvo una perbona acoyida ente universitarios y ciudadanos de dellos conceyos d’Asturies”. Nel cursu cuntóse, recuerden dende’l CUPA, con una charra informativa, a mou de clas maxistral, del colectivu Softastur, dedicáu al desenrrollu y promoción de software llibre n’asturianu.

El variáu perfil del alumnáu

Dende’l CUPA amosaron el so contentu pola varidada procedencia del alumnáu del cursu, nel que participaron más de 20 persones d’Uviéu, Xixón, Corvera o Avilés, “cuntando, con un alumnu catalán recién llegáu a Asturies, qu’agora convirtióse yá nun falante d’asturianu más”, comenten, “amás d’un alumnu brasileñu”. Ente les profesiones de los alumnos, amás de dellos estudiantes, un bomberu, un psicólogu, una enfermera, delles ames de casa, un cocineru, una técnica en prevención, maestros de dellos niveles o una apareyadora, ente otros exemplos.