Entamen les XXXIV Xornaes d’Estudiu

Como tolos años nel mes de Payares, esti martes entamaben les XXXIV Xornaes Internacionales d’Estudiu que van desenvolvese hasta’l xueves nel salón d’actos de la Facultá de Filosofía y Lletres de la Universidá d’Uvieu.

La inauguración tuvo llugar el martes a les 16,15 hores cola presentación de dos espublizaciones de l’Academia de la Llingua Asturiana, la edición dixital del “Lletres Asturianes 113” y el quintu númberu de la revista dixital “Ciencies. Cartafueyos de Ciencia y Teunoloxía”, dixirida por Carlos Lastra.

Tres de la presentación entamaron les xornaes propiamente diches con una ponencia de la decana de Filolofía y Lletres, Cristina Valdés Rodríguez (ALLA & Universidá d’Uviéu) que presentó un “enfoque polisistémicu a la traducción n’asturianu: normes y estratexes”.

A les 17,45 entamaron les comunicaciones cola que presentó Xuan Xosé Sánchez Vicente sobre la “Llectura y valoración del Viaxe del tíu Pacho el sordu a Uviedo”, la d’Armando Murias Ibias sobre l’orixen mineru de guah.e a traviés de la lliteratura y les de Pablo Rodríguez Medina, “Corredores de la memoria. Actualizaciones de la herencia clásica na poesía asturiana d’Aurelio González Ovies”, y de Pablo Suárez García “La torna del Quixote a la nuesa llingua”.

La Xornada finó depués de qu’a les 19 hores ufriera una conferencia Laura Martínez Martín (Universidá de Lisboa) sobre los “Otros horizontes: la aparición de la lengua asturiana en las cartas privadas de los emigrantes de principios del XX”.

Esti miércoles 4, les Xornaes entamarán con Guillermo Lorenzo. (Universidá d’Uviéu) entrugánodse “¿Por qué no en asturianu? El infinitivo flexionado como apomorfía negativa de la lengua asturiana”. Tres del alderique, presentaránse les comunicaciones d’Inaciu Galán y González (“La llingua asturiana nel tardofranquismu al traviés de la revista Asturias Semanal (1969-1977)”), de Próspero Morán López y Rubén Martín-Llames (“Comunicación institucional y llingua asturiana na era d’Internet: el casu de Xixón”), Nicolás Bartolomé Pérez (“Los glotónimos asturianu, bable, lleonés, mirandés y asturlleonés nos principales diccionarios de les llingües ibériques”) y Alberto Gómez Bautista (“Contributo para una história do asturo-leonês em Portugal”).

Tres de la posa vendrán les ponencies de Teresa Bellido Calduch (Universidá de Castelló & Universidá d’Uviéu) sobre el “Estudiu de los niveles d’usu, valoración y actitúes llingüístiques hacia la Llingua Asturiana qu’amuesen los futuros maestros. Implicaciones educatives y curriculares”. Y la de María Olga Álvarez Huerta (Universidá d’Uviéu) alrodiu de “Los verbos con prefijo a- en asturiano”.

La xornada final del xueves entamará con José Virgilio García Trabazo (Universidá de Santiago) falando de “Toponimia prelatina de Asturias: balance y revisión crítica”, pa siguir darréu con delles comunicaciones de Xuan Xosé Lajo (“El pretéritu indefiníu en senabrés – Estudiu de les variaciones xeográfiques”), Rosabel San Segundo Cachero (“Negación metallingüística y negación oracional: non y nun”) y Carmen Muñiz Cachón (“Aspeutos pragmáticos y entonativos de ho”). Tres la posa, les ponencies de Roberto González-Quevedo González (ALLA & Universidá d’Uviéu) sobre “Marcadores n’asturianu” y de Rosa María Medina Granda (Universidá d’Uviéu) sobre oralidá lliteraria na Edá Media asturiano-lleonesa: “una hipótesis interdisciplinaria” pesllarán les Xornaes d’esti añu.