Entamen en Ciañu les II Xornaes “De castilletes y carbón”

Esti miércoles 2 de payares, el Centru de Referencia de la Cultura y la Llingua Asturiana Casa de los Alberti de Ciañu acueye la presentación de la segunda edición de les xornaes culturales “De Castilletes y carbón”. Trátase d’una actividá de dinamización cultural que ponen en marcha la Fundación Nuberu y el Conceyu de Llangréu. Estes actividaes van empezar esti xueves día 3 de payares en Ciañu y van acabar el día 4 d’avientu nel Nuevu Teatru La Felguera.

Estes xornaes culturales, De Castilletes y carbón, xiren alredor de les interrellaciones ente mina, música, lliteratura, toponimia, sociedá… y s’articulen nuna serie de ponencies sobre estos temes, “Los Xueves de Castilletes y Carbón” na Casa los Alberti, y rematen con un conciertu del grupu Nuberu nel Nuevu Teatru La Felguera’l día de Santa Bárbola.

Mañana, xueves 3 de payares, a les 20:00 hores, va celebrase un recital lliterariu con Ana Vanesa Gutiérrez, Pablo Rodríguez Medina, Xulio Arbesú, Manuel Asur y Chechu García, abriendo los actos d’estes xornaes.

El xueves 10 de payares a les 20:00 hores va poder sentise la conferencia “Lliteratura y mina”, con Benigno Delmiro Coto. Una selmana dempués, el xueves 17 de payares sedrá’l caderalgu y miembru de l’ALLA Xose Lluis García Arias quien fale d’“El Conceyu Llangréu na toponimia medieval”, zarrando les actividaes del mes, el 24 de payares, Rubén Vega García, que va falar de “Canciones de mina nel mundu”.

Yá nel mes d’avientu, el xueves 1, Heriberto Gutiérrez García dará la conferencia “La huella etnográfica de la mujer en la Cultura Asturiana reciente: Desde la ruptura con la vida campesina hasta la crisis del modelo industrial. Apuntes sobre un futuro incierto”, zarrándose les xornaes col conciertu de Nuberu nel Nuevu Teatru La Felguera, el domingu 4 d’avientu.