Les sidres con glamour reivindiquen so espaciu nos restoranes

Más d’un cientu de persones, ente periodistes, llagareros, hosteleros y espertos del mundu de la sidra, participaron el vienres pasáu na primer edición del Salón Internacional de Sidres de Gala, que se celebró nun hotel xixonés y que sirvió pa dar a conocer les sidres de mesa que se tán produciendo nel país y n’otros llugares, yá que tamién se pudieron prebar delles sidres d’Alemaña, Bretaña, República Checa y otros llugares, amás de dellos productos gastronómicos del país. Un actu qu’espera sirvir pa promocionar l’usu de sidres distintes de la natural en xintes y cenes, amás de n’actos oficiales, onde’l vinu foriato y los caves entá siguen siendo los protagonistes.

Los convidaos a esti Salón de les Sidres de Gala yeren recibíos con unos culinos de sidra a la puerta l’hotel onde se celebraba la cena. Darréu pudo vese’l documental ‘Procesual’, onde se ve’l procesu que se lleva a cabu pa facer la sidra asturiana.

Enantes de la cena, el gourmet Serxu Solares dio a prebar un cóctel fechu con sidra y vodca, al que siguió una creación del mesmu autor, “caviar de sidra y una yema falsa con sidra de la Champanera de Villaviciosa”, que pudo prebase yá nes meses, onde a los convidaos-yos esperaben más de 15 variedaes estremaes de sidra.

Sidra axampanao, de nueva espresión, sidra de xelu, oruxu de sidra, crema de sidra… y de caúna d’elles la posibilidá de prebar la de dellos llagares asturianos, y dalgunos d’otros países. Amás, una preba de conserves de gastronomía asturiana, con patés, cebolles rellenes, fabada, callos o quesos, ente otros platos. En caún de les paraes que se facía pa prebar sidres, los propios llagareros y dellos espertos gastronómicos fueron esplicando les característiques de caúna de les bebíes.

L’actu organizábalu la Fundación Asturies XXI y la revista La Sidra en collaboración cola Conseyería d’Agroganadería d’Asturies y la Conceyalía de Cultura de Cultura de Xixón, pola que tuvo Xosé Nel Riesgo como representante, disculpando l’ausencia del conceyal, Carlos Rubiera, por otru actu coincidente nel tiempu. Riesgo recordó’l compromisu del nuevu gobiernu de Xixón y Asturies de llevar la bebida asturiana a los acto oficiales y recordó na so intervención la importancia del sector agroalimentariu na economía asturiana, pesie a que según dixo, “nun se tien puxao por él”.

Intervinó tamién nel actu, Llucía Fernández Marqués, directora de la revista La Sidra y Marcos Abel Fernández, presidente de la Fundación Asturies XXI que pidió que’l compromisu pa cola sidra asturiana del gobiernu actual se faiga realidá con fechos.