El XXXVI Festival Internacional de Música y Danza Popular d’Avilés amplíase a 4 países

La concejala de Festexos, Ana Hevia, y Abelardo González Blanco, presidente de “Sabugo ¡Tente Firme!”, presentaron esta selmana pasada en rueda de prensa la XXXVI edición del Festival Internacional de Música y Danza Popular d’Avilés que va desenvolvese na ciudá dende’l día 11.

Anguaño, la cita va tener llugar nel Centru Cultural Niemeyer dende’l 11 hasta’l 14 d’agostu, ampliando asina la so programación nun día más que n’ediciones anteriores. Les actuaciones van tener un aforu llindáu, polo que va ser necesaria la retirada d’invitaciones (totalmente gratuites) pa poder asistir a los distintos espectáculos. Les invitaciones podrán recoyese dende’l xueves, 4 d’agostu a les 12:00, nel Centru Cultura Niemeyer y nes taquilles de la Casa Municipal de Cultura. Podrán retirase 2 invitaciones per persona.

Les agrupaciones que participen nesta edición son:

Grupu Etnofolclórico Renascer (Portugal)
Fundación Cultural Mladost-Zaluzani (Bosnia Herzegovina)
Fundación Themba Njilo (Suráfrica)
Agrupación Folclórica “Sabugo ¡Tente Firme!” d’Avilés (España)
Sobre les agrupaciones

Grupu Etnofolclórico Renascer (Portugal)

Formación de 34 componentes creada na parroquia de Viana do Castelo. Naz coles mires de ser un vehículu de tresmisión de la cultura y l’arte popular, presentando sobre l’escenariu una variedá de soníos, cantares y bailles que componen un espectáculu vibrante de variedá cultural y etnofolclórica sofitáu na antigua cultura Vianense.

Fundación Cultural Mladost-Zaluzani (Bosnia Herzegovina)

Con 34 componentes, foi fundada y tien el so centru de trabayu na ciudá de Banja Luka, que pertenez etnográficamente a la rexón ‘País’, por esti motivu nel so repertoriu atopense coreografíes de dicha rexón y de Bosnia y Herzegovina.

Fundación Themba Njilo (Suráfrica)

Dedicada al desenvolvimientu social y cultural de la infancia, esta agrupación de 19 componentes centrase nos güérfanos y neños y neñes en situación vulnerable. Foi fundada en 1984 na rexón de Kwa Zulu, el so repertoriu destaca pola colorida indumentaria, la fuerza de les sos dances y los cantares tradicionales.

Agrupación Folclórica “Sabugo ¡Tente Firme!” d’Avilés (España)

Los sos 30 componentes, al traviés de les sos actuaciones por dellos rincones del mundu, traten de fomentar y cultivar les vieyes costumes marineres del folclore asturianu, cuantimás les del vieyu barriu de Sabugo. Tamién tomen nesta agrupación la Danza Rexonal Asturiana, englobando asina’l folclore del interior de la comunidá autónoma asturiana.