El Tribunal Superior dicta una sentencia contraria a la Llei d’usu nun nuevu “despropósitu xurídicu dafechu”

El Tribunal Superior de Xusticia d’Asturies vieno acabante facer pública esti mes una sentencia desestimando la demanda d’un funcionariu de l’Alministración del Principáu d’Asturies, al que se-y ñegó l’esfrute de les sos vacaciones añales por solicitales al traviés d’escritu redautáu en llingua asturiana. L’Aconceyamientu de Xuristes pol Asturianu califícala de “despropósitu xurídicu dafechu” y va sofitar el correspondiente recursu d’amparu al Tribunal Constitucional.

Nun comunicáu emitíu esta fin de selmana, l’Aconceyamientu de Xuristes pol Asturianu daba cuenta de que’l Tribunal Superior de Xusticia d’Asturies vieno acabante facer pública esti mes una sentencia desestimando la demanda d’un funcionariu de l’Alministración del Principáu d’Asturies, al que se-y ñegó l’esfrute de les sos vacaciones añales por solicitales al traviés d’escritu redautáu en llingua asturiana.

Según Xuristes pol Asturianu, “lo alloriante del casu ye que la sentencia, tres reconocer qu’en tala Alministración hai conseyeríes que faciliten pidimientos asemeyaos, mesmamente unviando a los sos funcionarios impresos al efeutu redautaos n’asturianu; otres que nun lo faciliten pero tolérenlo y tramiten los permisos ensin problema dalu; y, al cabu, una, la de Presidencia, empobinada por María José Ramos, que lo torga, concluye afitando que talu enguedeyu nun ye contrariu al artículu 14 de la Constitución Española que proclama el principiu d’igualdá de tratu y non discriminación, por más que nel “Plan pa la normalización social del asturianu, 2005-2007”, robláu pol gobiernu d’Areces y tolos grupos parllamentarios de la Xunta Xeneral, l’Alministración Asturiana se comprometiere, de magar l’añu 2005, a “Facilitar progresivamente a los trabayadores del Principáu d’Asturies la conocencia y usu de la llingua asturiana y, nel so ámbitu, del gallego-asturianu”.

Pa llegar a onde llegó, el Tribunal Superior de Xusticia d’Asturies hebo, endenantes, de caltener qu’onde la Llei 1/1998 diz que “Tolos ciudadanos tienen el drechu al usu del bable/asturianu nes comunicaciones orales o escrites col Principáu d’Asturies” (artículu 4) y ampara “la non discriminación de los ciudadanos por esti motivu” (artículu 3), hai qu’entender que la referencia a ciudadanos nun incluye a los funcionarios públicos por mor de la so especial suxeción, magar que la categoría xurídica de les rellaciones d’especial suxeción vien calificándose pela doctrina postconstitucional en términos asemeyaos a los darréu: “Fue importada desde Alemania a España a finales del anterior régimen y en aquel momento se empleó de forma expansiva para legitimar diversos abusos de aquel poder no democrático. Como se ha afirmado con acierto, fue muy cómodo para la jurisprudencia tapar los déficits de legalidad utilizando este ungüento mágico de las relaciones de especial sujeción” (Don Lorenzo Cotino, Revista del Poder Judicial, númberu 55, añu 1999).