El Senáu gana namái qu’ocho muyeres y el Congresu nin eso

El Senáu gana ocho muyeres na próxima llexislatura respecto a l’anterior, anque les senadores van continuar siendo menos d’un terciu del ‘hemiciclu’, pese a qu’estos fueron los primeros comicios llexislativos nos que s’aplicaron les listes paritaries qu’estableció la Llei d’Igualdá. En concreto, de los 208 miembros de la Cámara Alta elixíos ayeri, 66 son muyeres, a les que se sumen pel momentu cuatro senadores autonómiques. La citada norma obligaba a los partíos a que, en cada tramu de cinco puestos de les sos candidatures, nengún de los dos sexos va superar el 60 por cientu, lo que nun garantizaba que nengún de los dos xéneros ocupara los puestos de salida. Pese a esta normativa, en total, son 70 les muyeres que van sentase nun hemiciclu de 264 escaños, frente a les 62 de l’anterior llexislatura, anque la cifra pue crecer. Per un llau, porque tovía nun se conocen los nueve senadores que va designar Andalucía, que tamién celebró elecciones ayeri, y per otru, porque falten los cuatro nuevos que correspuenden a Madrid, Cataluña, Canaries y Baleares, respectivamente, por aumentar la so población (Andalucía tamién gana ún, pasa d’ocho a nueve designaos). Teniendo en cuenta estes cuestiones, nos bancos del PP van sentase esti añu 35 muyeres (28 na pasada llexislatura) y nos del PSOE 27, idénticu númberu al anterior al 9-M. En cuantes a la Entesa Catalana de Progrés suma una muyer y llega a cinco senadores, CiU pasa d’una a dos y el PNV de dos a una.