El Principáu abre la convocatoria pa crear un Catálogu de l’Actividá Escénica profesional

La Conseyería de Cultura, Política Llingüística y Turismu vieno acabante abrir la convocatoria pa la creación d’un Catálogu de l’Actividá Escénica profesional asturiana, del que van formar parte producciones escéniques de compañíes y empreses escéniques aniciaes n’Asturies, pertenecientes a los ámbitos de la danza, teatru, circu, maxa, teatru d’oxetos y títeres.

Les artes escéniques cunten con especial relevancia nel mundu cultural asturianu, tienen  llarga trayectoria na rexón y amuesen una notable vitalidá y adaptación a los llinguaxes y enclinos espresivos más actuales, destacando pola so creatividá ya inxeniu.

Por eso, considérase necesariu cuntar con un catálogu de l’actividá escénica, nel que les distintes compañíes o artistes profesionales puedan incluyir detalles de los sos espectáculos que puedan ser susceptibles de ser programaos para la so exhibición.  Amás, esti catálogu va dexar cuntar con un preséu d’analís y valoración de la situación actual de les artes escéniques asturianes y, va sirvir de soporte a la programación cultural promovida pola Alministración asturiana,  cuantimás al Circuitu d’Artes Escéniques del programa Asturies, Cultura en Rede, que va tomar como base esti llistáu.

Van Poder formar parte d’esti catálogu producciones escéniques de compañíes y empreses escéniques aniciaes n’Asturies, pertenecientes a los ámbitos de la danza, teatru, circu, maxa, teatru d’oxetos y títeres, que tendrán d’inscribise antes del martes 19 de xineru de 2021 al traviés de la web http://panel.asturiesculturaenrede.es

Consultar tola información y les bases completes de la convocatoria equí.