El Principáu abre en Tinéu’l nuevu circuitu cultural Xacobéu

El Gobiernu d’Asturies va inaugurar esti domingu en Tinéu’l nuevu circuitu cultural Xacobéu pa promocionar l’añu santu compostelanu al traviés de proyectos rellacionaos col Camín de Santiago que se van representar en conceyos polos que pasen les rutes xacobees.

En total, escoyéronse 14 propuestes de dolce artistes, profesionales y empreses asturianes que se van amosar en 18 conceyos hasta avientu. Música, artes escéniques y videomapping conformen les actividaes d’esta iniciativa, que s’enmarca nel programa de circuitos culturales Asturies, Cultura en Rede, y al que la Conseyería de Cultura, Política Llingüística y Turismu destina 55.676 euros.

Asina, Carlos Alba Cellero va presentar en Tinéu El Xuglar del Camín, una serie d’hestories, lleendes, cuentos, romances y coples cantaes al son del rabel sobro’l Camín Primitivu. Pela so parte, Anabel Santiago va llevar a Tapia de Casariego La muyer nel Camín, col fin de sopelexar el cancioneru popular de les rutes xacobees al traviés de la óptica femenina y al traviés de distintos xéneros musicales. Amás, Slum Suit va faer en Llanes una repasada de la música que puede escuchase nel Camín con un cuartetu de jazz y la gaita como preséu solista en Siguiendo’l camín de Iturralde.

La Orquesta Céltica Asturiana va ufiertar en Salas el conciertu pedagóxicu Pasu a pasu, músiques del Camín, y Héctor Braga en Colunga Soníos del Camín, un espectáculu qu’amuesa los raigaños culturales rellacionaes col Xacobeo al so pasu pol Principáu. La soprano asturiana Tina Gutiérrez y la cantante gallega Lucia Pérez van amosar en Corvera y Mieres los cantares más representativos del repertoriu tradicional de dambos territorios n’Asturies y Galicia: unión de dos cultures. Amás, Celso Díaz Band va actuar en Pravia, Eva Texedor & -yos Pandereteres, en L.lena, y Alfredo González, n’A Veiga.

Guayominí Producciones va desvelar en Carreño histories, mitos, acertijos y poemes al traviés de los güeyos d’una pelegrina venida de tiempos bien antiguos en Lleendes del Camín, ente que El Caleyón del Gatu va conducir al públicu en Sotu’l Barcu por un viaxe de fantasía y humor nel sieglu XVII con Concha, Bardón y Calabaza, pícaros y pelegrinos.

Les aventures y andances d’un mozu escuderu nel so viaxe xuntu al rei Alfonso II’l Castu a Santiago de Compostela van llegar a El Franco, Grau, Navia y Siero de la mano de Escenapache en Manín y el primera pelegrín, ente que de la mano d’Hixénicu Papel Teatru dos pícaros parlanchines y un músicu mudu van cuntar en Villaviciosa la hestoria de los dolce reis que tuvo Asturies, destacando les hestories rellacionaes col Camín de Santiago, en Diestru y Accidente pel Camín.

La lluz qu’alluma a los pelegrinos va ser la protagonista de los videomapping de Roberto Lorenzo, que va presentar en Castropol una concatenación d’imaxes sobro los caminos de Santiago n’Asturies.

Les feches y horarios pueden consultase na web www.asturiesculturaenrede.es, onde s’actualiza la información.

El proyectu Asturies, Cultura en Rede, impulsáu por Cultura en collaboración colos conceyos y xestionáu pola Sociedá Pública de Xestión y Promoción Turística y Cultural, inclúi circuitos temáticos d’artes escéniques, artes visuales, música, cultura tradicional y lliteratura, amás del Xacobéu. A estos hai que sumar el circuitu Autores nel Camín, entamáu pola Dirección Xeneral de Política Llingüística y protagonizáu polos ganadores de los premios en llingua asturiana.

Les característiques de cada circuitu detállense de siguío:

Circuitu Xacobéu. 14 proyectos de dolce artistes, profesionales y empreses asturianes que se van programar en 18 conceyos hasta final d’añu. Cultura destina 55.676 euros a esta iniciativa.
Circuitu d’artes escéniques. Los 38 artistes o compañíes escoyíos van presentar hasta fin d’añu 57 actividaes en 88 representaciones programaes por 40 conceyos. Cultura destina 232.164 euros a esta iniciativa.
Circuitu de música. Los 37 artistes o grupos solicitaos por 31 conceyos van protagonizar 45 actuaciones nel segundu semestre. Cultura destina 131.736 euros a esta iniciativa.
Circuitu de cultura tradicional. 14 compañíes van llevar 16 propuestes distintes a 27 conceyos n’otres tantes actuaciones hasta avientu. Cultura destina 48.860 euros a esta iniciativa.
Circuitu de lliteratura. Los 27 proyectos de 21 ceadores van llegar esti semestre a 30 conceyos en 54 actividaes. Cultura destina 45.957 euros a esta iniciativa Circuitu d’artes
visuales. Los dolce proyectos escoyíos na última convocatoria van esponer a partir del 1 de xineru de 2022 y l’inversión en costos de producción asitiar en 100.000 euros. Pal últimu semestre d’anguaño confirmáronse siete propuestes d’otros tantos artistes, incluyíes na convocatoria anterior, que podrán vese en 12 esposiciones en 10 conceyos.
La Cinemateca Ambulante. Ta preparándose la programación d’ochobre a avientu, con una inversión pal últimu trimestre del añu de 23.768 euros.
Circuito Autor nel Camín. Protagonizáu por escritores y artistes ganadores de los premios lliterarios en llingua asturiana que convoca la Conseyería de Cultura de les convocatories de 2019 y 2020, amás de dos autores en eonaviego. Quince creadores y artistes ufierten 46 actividaes en 19 conceyos hasta avientu. Esti circuitu, financiáu íntegramente pol Principáu, cuenta con un presupuestu añal de 37.270 euros.

Descargar programación Circuito Xacobéu