El PP de Xixón presenta un Plan de Normalización alternativu con 118 midíes y pide que se declare l’asturianu “llingua propia del conceyu”

El Grupu Municipal Popular de Xixón presentó ayeri, na Comisión de Facienda del Ayuntamientu de Xixón, enmiendes al proyeutu d’Ordenanza del asturianu y al Plan de Normalización que promueve l’equipu de gobiernu, formáu pola coalición d’Izquierda Xunida-BA-LV y el PSOE. Pa la Ordenanza los populares presentaron nueve enmiendes, ente les que destaca la petición del Partíu Popular de que se modifique la denomación del asturianu na norma municipal, recoyendo que “asturianu y castellanu son llingües propies del conceyu de Gijón/Xixón, siendo amás l’asturianu llingua tradicional”.

Y ye que na redacción del testu del gobiernu llocal xixonés, comenten dende’l PP, “nun se mencionaba’l calter de propia pa la llingua asturiana”. Nel casu del Plan de Normalización, el Grupu Municipal Popular presentó una enmienda a la totalidá, pa lo que presenten un plan alternativu con más de 118 midíes, un proyectu que pa los responsables del PP ye “distintu del de la esquierda institucional, y más avanzáu nos sos oxetivos”.

El PP presentó un Plan con 118 midíes, “nuna redacción yá abreviada, col envís de favorecer un posible consensu ente toles fuerces polítiques”, comenten fontes populares. El proyectu preséntase “col enfotu d’aportar a una plena normalización del usu social de la llingua nos estremaos ámbitos del conceyu”, y apuesta por llinies d’actuación “qu’impliquen una importante interrellación cola sociedá xixonesa”.

Los dos planes coinciden eso sí, n’otorgar drechos llingüísticos a los asturfalantes xixoneses dientro de l’alministración del conceyu, amás de midíes como la creación d’una canal de televisión llocal con programación billingüe, amás de la rotulación de tolos edificiones municipales, el fomentu del deprendizaxe del idioma, la implicación del sector empresarial na normalización del asturianu y una llarga riesta de midíes normalizadores.

El proyectu de la Ordenanza presentáu pol equipu gobiernu lloca y les enmiendes al mesmu van discutise nel plenu del mes de xunetu, depués de dellos retrasos burocráticos que nun permitieron facelo nel del mes de xunu, como taba anunciao.