El PP asturianu sostien que les resultancies de PISA ameyoraron «gracies» a les reformes educatives

El diputáu del PP na Xunta Xeneral del Principáu y voceru d’Educación del so grupu, David González Medina, afirmó esti miércoles que les resultancies d’España nel informe PISA 2015 ameyoraron “gracies a les reformes d’estos últimos cuatro años”.

Según Medina, l’informe amuesa qu’España “tien dos niveles bien estremaos: el Norte y el Sur. Y dientro del Norte, como siempres pasa, la que ta a lo cabero, xuntu al País Vascu, ye Asturies”.

Al respective, criticó la xestión del actual conseyeru asturianu d’Educación, Genaro Alonso, reprochando qu’ataque al ministru “como queriendo faer ver que les sos polítiques tán llevando a España a una especie de caos educativu”. Asina, considera que l’informe desmonta los argumentos del conseyeru y delles asociaciones “a les que-yos gusta dicir na cai lo que nun ye verdá”.

De la mesma, esixe al conseyeru que ponga en marcha midíes educatives efectives “porque Asturies ta a lo cabero del Norte d’España”. “Hai que midise colos vecinos y quien tán nel mesmu espectru”, dixo, incidiendo en que Castiella y Llión ta “a primer nivel mundial”, recordando que ta gobernada pol PP. Amás, remarcó que les comunidaes con llibertá d’elección de centros y les qu’apuesten pola primer etapa educativa de 0 a 3 años “tienen meyores resultaos qu’Asturies”.