El PP acusa a la TPA de manipulación nel programa posterior al alderique del llunes

El PP asturianu acusó a Televisión del Principáu d’Asturies (TPA) de tratar de beneficiar al PSOE Nel programa que la canal emitió esti llunes, dempues del alderique ente los dos candidatos a la presidencia del gobiernu. Los populares asturianos esixeron el cese inmediatu del responsable de la emisión y dirección del programa.

Según el PP el programa taba preparáu d’antemano pa favorecer los intereses de partíu socialista. “Namái basta con mirar los perfiles socialistes de dalgunos intervinientes pa dase cuenta de lo que buscaba la dirección d’informativos de la TPA, responsable directa de la dirección y emisión d’esta vergoñosa charra a favor del PSOE”, deniciaren dende’l PP.

Los redactores de TPA, pola so parte y nun cominicáu, negaren cualquier intentu de manipulación por parte de la canal autonómica. Amás defendieron “l’abosluta y total independencia informativa de la redacción en tolos temes qu’aborden nos sos espacios”, al tiempu que convidaron al PP a llevar l’asuntu a la Xunta Electoral Central si lo creen conveniente.

Según la redacción de la Televisión del Principáu d’Asturies, el PP vien intentando imponer a los servicios informativos de TPA’l conteníu del espaciu electoral y les persones que deben apaecer n’elli. Amás denunciaren les constantes torgues que nel trabayu-yos ta poniendo l’equipo de campaña de la candidatura de Gabino de Lorenzo.