El plenu del Conceyu de Xixón aprobó les Ordenances d’usu del asturianu ensin votos en contra

El plenu del Conceyu de Xixón aprobó ayeri de forma definitiva la Ordenanza Municipal del Usu del Asturianu. Una normativa municipal que declara que l’asturianu y el castellán “son llingües propies” del Conceyu. La norma aprobóse colos votos a favor del PSOE ya Izquierda Xunida-BpA-LV y l’abstención del Partíu Popular.

L’abstención del PP, esclarió Manuel Pecharromán, voceru conservador nel conceyu, débese a lo qu’él califica d’“irregularidaes alministratives”, dexando claro en tou casu que la intención del so grupu ye “defender l’usu del asturianu” y qu’ello “queda demostrao con namás mirar el Plan de Normalización pal Conceyu alternativu que presentaron, con 118 puntos frente a los 51 puntos que plantiaba l’equipu de gobiernu”.

Nesti sen, Manuel Pecharromán afirmó que’l PP abstúvose nesta ocasión porque “na Gaceta del Conceyu publicada en xunetu afirmárase que yá s’aprobara la Ordenanza, lo que nun sucediera de forma definitiva, y qu’a pesar de que l’equipu de gobiernu falara de subsanar l’error nun lo fixera”.

Otramanera, el Conceyal de Llingua Asturiana Jesús Montes Estrada “Churruca” (IX) defendió esta Ordenanza como “dalgo positivo, necesario y bono pa la ciudá como un derechu más de la ciudadanía de Xixón”.