El plan estratéxicu del campus de Mieres va incluyir nuevos institutos d’investigación

El nuevu rector de la Universidá d’Uviéu, Ignacio Villaverde, treslladose esta selmana pasada a Mieres, na so primer visita a un campus,  anunciando qu’el so equipu yá tien “un plan estratéxicu” pa Barredo. 

Villaverde destacó que’l campus de Mieres tien una singularidá que fai que s’estreme d’otres instalaciones y que “va xenerar una interrellación provechosa con Xixón. Aquella idea de Juan Vázquez de la milla de la conocencia’ tenemos que tresformala na autopista’ conectando dambos campus”.

El rector nun quixo falar de más graos pal campus, convencíu de que “el problema nun son les nueves titulaciones. Sé qu’hai una obsesión con ello, pero lo qu’hai que faer ye fortalecer les actuales, reforzar el posgrado, que ye’l gran apueste de futuru de les universidaes».  Villaverde refugó dar más detalles a la espera, como se dicía, de caltener una xunta col alcalde, que de xuru va ser la próxima selmana.

El rector destacó que’l plan estratéxicu trai, amás, un procesu “nel qu’hai qu’implicar al propiu campus y al equipu directivu nel so diseñu más específicu. Ye daqué que nunca se fixo na Universidá d’Uviéu, y yera importante empezar por esti campus porque se trata d’una idea bien potente. Amás de la investigación y la docencia, tien un potencial cultural nel sentíu d’esplotar l’espaciu patrimonial mineru. Queremos convertilo nuna exa d’actividá cultural en Mieres y na contorna”.