El PAS cedió tolos poderes a la Xunta Nacional nel Congresu celebráu esti sábadu en Xixón

El Partíu Asturianista (PAS) celebró esti sábadu pasáu’l so V Congresu Nacional en Xixón. Nel mesmu, Xesús Cañedo presentó’l balance de los cuatro años últimos de xestión de la Executiva, que foi aprobada por mayoría absoluta.

Nel mesmu, Cañedo comentó que’l partíu nun presentaba ponencia política nin estratéxica “porque taben agotaes toles opciones”, anque lo mesmo él, que’l presidente del Partíu, reescoyíu tamién por mayoría absoluta, recordaron la “llarga trayectoria de ventidós años de Partíu”, qu’anque “nun vive’l so meyor momentu, aportó abondo a Asturies y a los asturianos nuna montonera de cuestiones”.

Nel actu renovóse al Tribunal y a la Xunta Nacional, que dende agora asume toles competencies del Congresu del partíu, sacantes la disolución del mesmu.

Amás, aprobóse un documentu políticu, qu’ufrimos n’Asturnews, y reafirmóse la continuidá del pactu cola URAS, na Unión Asturiana, y la intención de trabayar en “siguir ampliando pactos y consensos con otres fuercies”.

Al actu acudieron representantes de la Unión Renovadora Asturiana, ente los que tuvieron Sergio Márques, presidente d’honor del mesmu y ex presidente d’Asturies.