Andecha Astur pronúnciase sobre la polémica cola filoloxía asturiana

Énte los fechos asocedíos na Xunta de Facultá de Filoloxía, onde una propuesta del profesor Félix Fernández de Castro y la posterior votación, que salió ganadora con mayoría relativa, aparta a la llingua asturiana nel nuevu plan de titulaciones universitaries lo que supunxo la dimisión d’Ana Cano como decana de Filoloxía y l’encierru de un grupu d’estudiantes nel edificiu del Rectoráu reclamando la especialidá de filoloxía asturiana Andecha Astur quier espresar lo que vien darréu:

1º Andecha Astur amuesa la so solidariedá cola decana dimisionaria Ana Cano y colos estudiantes que caltienen l’encierru nel Rectoráu de la Universidá d’Uviéu.

2º Lo asocedio na xunta de la Facultá de filoloxía hai qu’interpretalo na clave de represión llingüística que se vive n’Asturies: Non oficialidá, segregación llingüística del ocidente asturianu, torgues pa la escolarización…

3º Que too ello respuende al interés del arecismu de caltener enllamargada a la sociedá asturiana y concretamente a los seutores más concenxaos de la mesma, nun confictu llingüísticu que nun tien igua mentes el seutor qu’ellos representen nun asuma unos principios democráticos básicos.

Nesi sen, Andecha Astur camienta prioritario asimilar la consideranza de “conflictu llingüísticu” a “conflictu democráticu”, y asume la necesidá de marcar les propies llinies y ritmos d’actuación, a la gueta de la necesaria normalización democrática n’Asturies.

4º Que ye de ver comu pa caltener esi conflictu llingüísticu l’arecismu vese obligáu a recurrir ca vuelta con mayor frecuencia a ellementos españolistes ultrareacionarios, lo qu’espeya el so progresible aisllamientu social.

5º Que consideramos d’un hipócrita inaceutable la postura d’IU, que non solo nun llevó alantre la oficialidá cuandu tenía capacidá pa ello, sinon que nos conceyos onde gobiernen siguen ensin respetar los drechos llingüísticos de los sos vecinos.

6º Que la custión política fundamental nestos intres, y de la que pretenden desviar l’atención ye la reforma d’un estatutu impuestu que tampocu se mos va a permitir votar, y la esistencia de una istitución comu’l “Princiapdo” impuesta dende’l gobiernu central y que tampocu nun se mos permitió refrendar.

7º Q’ello asina, Andecha Astur considera que cualaquier rempuesta que se dea a esta y a futures agresiones llingüístiques pasa por facer que tean un coste concretu pal arecismu y pola so interpretacion en clave estrictamente política: la situación predemocrática que se vive n’Asturies, el papel represor del arecismu y l rialidá d’una istitución impuesta (el “Principado”) y d’un marcu políticu definíu por un Estatutu autonómicu tamién impuestu, qu’a diferiencia de vascos, andaluces, catalanes, canarios…. nun se mos permitió ensiquiera votar.

8º Descargamos tola responsabilidá de lo asocedio sobre la clase politica gobernante n’Asturies por ñegase a aceptar principios democráticos internacionalmente reconocíos y aplicaos polo demás nel restu l’estáu y siguir echando un etenru pulsu a la sociedá asturiana na tema llingüístico, negandose a solucionar un conflictu que tien una solución perfacil y que pue resumise en dos pallabres: OFICIALIDÁ YÁ.