El Partíu Asturianista celebra mañana sábadu’l so V Congreso Nacional en Xixón

El Partíu Asturianista celebra mañana na Biblioteca Xovellanos de Xixón el so V Congresu nacional, embaxo’l lema «CADA VEZ MÁS NECESARIOS». El PAS cumple 22 años d’esistencia nos que, pa los sos responsables, “débense-y aportaciones politiques importantísimes en tolos ámbitos: d’empléu, económiques, sociales, d’infraestructures”. Actualmente coaligáu con URAS n’UNIÓN ASTURIANISTA, la coalición tien una docena conceyales y les alcaldíes de Villaviciosa y Ponga.

La dirección del partíu entiende que representa, “frente a los partíos dependientes de Madrid (PSOE, PP, IU)”, tres coses fundamentalmente: “la modernidá social y económica, la mayor profundidá d’análisis de la realidá asturiana, la capacidá de defender y representar los intereses de los asturianos ensin sometelos a los d’otres comunidaes o a los de les cases centrales d’otros partíos”.

“Esa independencia y capacidá única de representación”, ponse, pal PAS “bien a les clares estos díes nos que s’está intentando remocicar l’Estatutu d’Autonomía”. Pa la organización asturianista “d’esos tres partíos vendepatries yá firmaren compromisos notres comunidaes que comprometen la suficiencia financiera d’Asturies y la igualdá económica, social y política de los asturianos”. Amás, albidren dende’l PAS “esos partíos nun van ser capaces de consensuar y aprobar p’Asturies un estatutu coles competencias y capacidaes que firmaren notros sitios como Valencia, Cataluña, Andalucía o Baleares”.