El Mercáu del Quixote convierte Xixón nun llugar de La Mancha

El Paséu de Begoña de Xixón acueye estos díes el Mercáu del Quixote, una amuesa de productos artesanos de la comunidá castellano-manchega que recrea’l tiempu de la novela de Cervantes. Moros con chilaba, panaderos de fornu y forxadores d’armes blanques recreen un llugar de La Mancha en plenu Paséu de Begoña.

El Mercáu qu’estos díes puede contemplase en Xixón tenta asemeyase al zocu onde según cuenta la hestoria del caballeru don Quixote s’alcontró el manuscritu nel que se narren les sos aventures. Productos gastronómicos de Castiella-La Mancha, incluíos los sos famosos quesos d’oveya y el vino áspero d’esa tierra, xunta obres d’artesanos tradicionales y modernos, componen esti Mercáu del Quixote nel que nun falta l’acompañamientu a los sones de la dulzaina, el tamboril y la gaita castellana.

El Mercáu del Quixote va poder visitase hasta esti miércoles 24 nel Paséu de Begoña de Xixón.