El Gobiernu implica al Estáu na defensa l’asturianu y oblígase a recuperar tolos nomes de llugar en 2007

Implicar al Estáu na promoción del asturianu, valorar esti idioma n’oposiciones, garantizar la ufierta de l’asignatura de Llingua “en tolos niveles y graos educativos”, completar la recuperación de la toponimia en 2007 y crear en 2006 un Premiu de les Lletres Asturianes con calter biañal. Son dalgunes de les 68 acciones concretes que plantega’l Plan pa la Normalización Social del Asturianu, cuyu testu íntegru ufre güei Asturnews.

A lo llargo de 22 páxines nes que s’elude la referencia espresa a una posible declaración d’oficialidá pa la llingua asturiana, pero qu’abren dafechu el camín a una coficialidá ‘de fechu’, el Gobiernu autonómicu oblígase a sigo mesmu a cumplir la gran mayoría de les midíes en o a partir d’esti mesmu añu, empezando por roblar sendos convenios col Estáu pa qu’emplegue con normalidá la llingua asturiana nos sos organismos asitiaos n’Asturies y pa que reconoza y use los topónimos tradicionales del Principáu. Pa dambos alcuerdos afítase un plazu inmediatu, non más allá de 2005.

Toponimia

Dos años más tardará en completase la recuperación total de los nomes de llugar n’asturianu, si se cumple lo previsto nel plan. El documentu establez pa 2007 la publicación del nomenclátor y mapa de topónimos oficiales d’Asturies, pasu que dexaría amarrada la validación global de los nomes tradicionales de llugar en llingua asturiana y que se completará cola retulación de cais, carreteres, mapes y planos por parte de la Conseyería de Mediu Ambiente, Ordenación del Territoriu ya Infraestructures.

Enseñanza

El plan col que’l Gobiernu aplicará la so política llingüística d’equí al final de la llexislatura autonómica mira amás con especial procuru pa la enseñanza y garantiza la ufierta de les asignatures d’Asturianu y Gallego-Asturianu “en tolos niveles y graos educativos”, si bien siguirán aplicándose les ‘ratios’ mínimes d’escolinos nos centros. Tres midíes destaquen nesta estaya: la llucha pola validez de los estudios de Filoloxía Asturiana -anque dexando-y la iniciativa a la Universidá d’Uviéu-, la edición d’un programa p’alfabetización d’adultos n’asturianu y la ellaboración, en 2006, d’un estudiu xurídicu sobro la posible especialidá’l profesoráu de Llingua en niveles non universitarios.

Usu institucional

N’otros ámbitos, el plan de normalización plantega incrementar l’usu del asturianu na publicidá institucional, la imaxe gráfica y la web oficial de l’Alministración autonómica; promueve la formación llingüística de los funcionarios n’andecha col Institutu Asturianu d’Alministración Pública ‘Adolfo Posada; alita la difusión del asturianu en tiendes, eventos deportivos y denominaciones d’orixe; y establez la publicación billingüe de “dalgunos testos normativos relevantes”.

Producción cultural

El plan de normalización nun s’escaez de la estaya de la cultura. El testu cuyos conteníos aprobó ayeri’l Conseyu de Gobiernu afita la creación, a partir de 2006, d’un Premiu de les Lletres Asturianes con calter biañal, promueve la presencia de la lliteratura n’asturianu en feries fuera’l Principáu, abre-y la puerta a la convocatoria d’ayudes directes a la creación y obliga a actualizar cada añu el catálogu bibliográficu n’asturianu. Toles midíes propuestes nel documentu tienen validez pal gallego-asturianu nel occidente d’Asturies.

Archivu. El Gobiernu da-y el preste a los conteníos del primer plan integral de normalización del asturianu