Xóvenes emigraos censuren a Areces por tildar de “lleenda urbana” la marcha de titulaos mozos

“Yo tamién soi una lleenda urbana”. Con esi espresivu títulu, xóvenes asturianos emigraos por motivos llaborales unvíen dende ayeri cientos de correos ellectrónicos pa censurar les pallabres del presidente autonómicu, Vicente Álvarez Areces, que’l pasáu miércoles negó la marcha masiva de titulaos na Universidá d’Uviéu. Los asturianos ausentes considérense insultaos por Areces y defínense como “una parte’l fracasu políticu”.

Nos mensaxes que los postuniversitarios asturianos emigraos empobinen a medios de comunicación y, n’ocasiones, al corréu personal del propiu presidente autonómicu, hai una reivindicación central: Constatar que miles de xóvenes asturianos se vieron obligaos a abandonar el Principáu a la gueta d’un puestu de trabayu, en contra del argumentu’l presidente y de la conclusión principal d’un estudiu de la Universidá d’Uviéu que sostién que sólo’l 23 por cientu de los llicenciaos y diplomaos emigra.

De los resultaos d’esi informe, allaboráu a partir del sesenta por cientu de la promoción d’estudiantes qu’acabó los sos estudios nel cursu académicu 2000-2001 na Universidá asturiana, tanto’l presidente’l Principáu como’l responsable de la investigación, el caderalgu Joaquín Lorences, dixeron estrayer que nun ye cierto que cuelen d’Asturies los xóvenes más cualificaos.

Asinamesmo, la investigación afaya un altu porcentaxe de postuniversitarios que realiza trabayos poco o nada relacionaos colos estudios que cursaron, y afita que los titulaos con meyores notes son los que primero y meyor se coloquen nel marcáu llaboral.

Un estudiu de la Universidá conclúi que sólo la cuarta parte de los titulaos emigra d’Asturies por trabayu