Portada Política El gobiernu del PSOE ya Izquierda Xunida en Xixón remata un llargu procesu col cumplimientu de la toponimia oficial

El gobiernu del PSOE ya Izquierda Xunida en Xixón remata un llargu procesu col cumplimientu de la toponimia oficial

by asturnet

Dende la llegada al gobiernu municipal de Xixón, en 2004, de la coalición formada pol PSOE ya Izquierda Xunida-Bloque por Asturies, les polítiques de normalización llingüística vienen ocupando una parte importante del alderique políticu xixonés. La FSA ya IX firmaben entós un alcuerdu pa gobernar n’Asturies y nos conceyos, onde l’asturianu ocupaba una parte importante de les midíes alcordaes. Sicasí, l’imcumplientu de parte d’esti alcuerdu, que se formalizó col Plan de Normalización Llingüística, llevó a importantes tensiones ente les dos fuercies, que sumao a otres cuestiones, fizo qu’en 2007 nun se repitiere’l pactu.

Pero nun foi asina en Xixón, onde les dos fuercies repitieron el pactu de 2004, faciéndose cargu esta vegada Izquierda Xunida, d’una Conceyalía de Cultura Tradicional y Política Llingüística, dirixida por Jesús Montes Estrada “Churruca” y llegando a dello alcuerdos nos que taben “fomentar l’usu institucional y públicu del asturianu nel ámbitu del conceyu nos términos nos que s’alcuerde”, la creación d’un nuevu Conseyu Asesor de la Llingua y la ellaboración d’un plan d’usos y unes ordenances acordies cola normativa vixente.

Foi yá na primer intervención nel Plenu de Constitución de la nueva corporación, el 16 de xunu de 2007 cuando “Churruca” recordó que dende la so formación “nun podemos escaecer el problema de llibertaes provocáu pol non reconocimientu de la Oficialidá de la llingua asturiana”, amás de recordar que “Dende esti ayuntamientu tenemos qu’enfotanos nes polítiques necesaries pa garantizar un usu normalizáu del asturianu nes rellaciones ente la ciudadanía y la so alministración, pa garantizar que nengún xixonés puea sentise discrimináu pol usu de la so llingua materna”.

Nesi momentu anunció que nesti mandáu actual “van desarrollase les midíes que faiga falta pa la normalización social del asturianu, aprobando pa ello unes Ordenances Municipales que regulen l’usu de la llingua nel Conceyu”. Ordenances que provocaron nel so día la dimisión en bloque del Conseyu Asesor de la Oficina de la Llingua de Xixon y que tovía güei nun ta aprobáu. Sicasí, el gobiernu de Xixón, yá anunció que va proceder a l’aprobación “nun plenu d’esti próximu branu”.

Sobre la necesidá de la oficialidá, qu’Izquierda Xunida lleva nel so programa, comentó nel 2006 Jesús Montes Estrada que nes negociaciones col PSOE “nel asuntu de la oficialidá nun se nos pueden pidir xuegos malabares nin que nos quememos a lo bonzo”. Yá entóa reconoció les dificultaes énte la negociación col PSOE del nuevu estatutu y tocante a la inclusión del asturianu oficial señaló que “sabemos perfectamente que van dicinos non”.

Per otru llau, llevóse nesto años alantre, el procesu d’oficialización de los topónimos tradicionales qu’afitaba la Llei d’Usu del Asturianu de 1998 y que terminó cola aprobación per parte del gobiernu asturianu y la so publicación nel BOPA, el 4 d’ochobre de 2006. Una toponimia, que salvo escases escepciones, nun llegó a aplicase nos documentos y cartelería del consistoriu.

Izquierda Xunidá amosó publicamente nesi tiempu’l so descontentu con esa situación y a principios d’esti mes de febreru sumóse’l Partíu Popular xixonés a esta reclamación con un comunicáu nel que denunciaba esta situación y pidía que se ficiere cumplir la llei. Otres organizaciones culturales y polítiques ensin representación nel consistoriu xixonés ficieron públiques tamién delles protestes.

El 22 de febreru, l’Alcadesa daba rempuesta a la reclamación d’Izquierda Xunida de cumplimientu de los pactos firmaos cola formación y emitía una instrucción na que recordaba la obligatoriedá del usu de la toponimia aprobada como oficial y daba un plazu d’un añu pa l’adaptación de les distintes estayes de l’alministración municipal.

Con esti nuevu pasu la toponimia de Xixón algama l’estatus que dende 1998-y daba la Llei d’Usu del Bable/Asturianu aprobada cola negativa de la FSA ya incumplida de contino nestos diez años de vixencia.

Tamién te podria gustar