El Gobiernu d’Asturies propón una candidatura conxunta d’Uviéu, Xixón y Avilés pa optar a la Capitalidá Europea de la Cultura en 2016

L’Alcalde y les alcaldeses d’Uvieu, Xixón y Aviles decidieron aceptar la propuesta del Gobiernu del Principáu d’Asturies pa presentar a estes tres ciudaes, de manera conxunta, como candidates a la Capitalidá Europea de la Cultura pal añu 2016. España y Polonia van compartir tala capitalidá esi añu.

La propuesta inicial de les exes de la programación prevista, que tien de presentase con calter definitivu en 2014-2015, y que nos díes próximos va entamar a formalizar colos representantes de los tres Conceyos implicaos, tien como elementos conductores:

• la creación y consolidación de redes europees tanto en materia de producción y fornimientu de productos culturales como nel desendolque d’iniciatives xeneraes pol tercer sector.
• los venceyos ente cultures indoeuropees y la conexón de les creatividaes europees coles cultures d’America y Asia.
• les redes de creadores en sectores estratexicos pa les industries culturales (les industries del entretenimientu y la creación dixital).
• les redes de cooperación cultural pal desendolque de les polítiques culturales nos países europeos nuevos y países candidatos.
• un desendolque específicu d’iniciatives empobinaes a la ciudá polaca elixida nos mesmos campos mencionados.

Va desendolcase amás un intensu programa d’actividaes y programes culturales coordinaos que definan y desendolquen la enorme fuercia creativa resultante del funcionamientu plenu enantes de fines de 2011 de la totalidá de los equipamientos pa grandes programaciones, que yá cuenten con instalaciones en marcha tan relevantes como los teatros Campoamor, Jovellanos y Palacio Valdes, el complexu de Llaboral Ciudá de la Cultura y otros equipamientos culturales. A ellos van xunise’l complexu del Centru Cultural Oscar Niemeyer n’Aviles, los nuevos Museos de Belles Artes y Arqueolóxicu n’Uvieu y el Archivu del Principáu d’Asturies.

La propuesta del Gobiernu del Principáu a los tres Conceyos implicaos ye la d’establecer d’inmediato un calendariu de trabayu que dexe que les instituciones promotores convoquen a instituciones culturales, científiques, patronos de les artes y la creación y colectivos y promotores culturales pa incorporar les sos iniciatives y propuestes al calendariu de trabayu y l’axenda de promoción de la candidatura.

El periodu de preparación y puesta en marcha de la candidatura, que va competir inicialmente con otres catorce n’España, ye d’aproximadamente dos años, tando prevista la convocatoria formal del procesu pol Gobiernu español en 2009 y la decisión final a lo llargo de 2010 o a principios de 2011. La evaluación de les candidatures la va facer una comisión de 13 espertos, seis de los cualos son elixíos pol país y los otros 7 pola Unión Europea.

Pal Gobiernu del Principáu, la Capitalidá Europea de la Cultura ye una oportunidá única de facer visible l’esfuerciu que les tres ciudaes asturianes vienen faciendo en materia d’equipamientos y programes culturales de calter internacional, con importantes elementos de tradición ya innovación combinaos y con exes d’actuación cooperatives qu’inscriben los valores y la creación local nos nuevos marcos dinámicos de la creatividá contemporánea.

Les muestres de la fuercia de la que surde la candidatura puen percibise de forma meridiana na fuerte presencia de la ufierta cultural nel triángulu asturianu. Son exemplu evidente dende la temporada de ópera o de zarzuela ovetenses a les programaciones internacionales de teatros ya instituciones con sede nes tres ciudaes, y les previsiones d’acciones futures que van multiplicar esa axenda. Esposiciones, conciertos, encargos de producción artística, dos orquestes sinfóniques d’alta calidá, un centru d’arte y creación industrial o un conxuntu de museos escelente, actividaes nel terren de la escena contemporánea o del espardimientu del patrimoniu.

L’impactu social de la capitalidá cultural ye innegable. De los casos de bones práctiques conocíos nestes decaes pasaes los meyores, como Glasgow, dexaron tres si un conxuntu de dinámiques locales nueves, formes de trabayu nueves y ampliación bultable del espaciu social de los y les creadores locales, alteraron pa bien la vida nos barrios introduciendo valores nuevos y práctiques creatives nes comunidaes menos favorecíes. Al tiempu recibieron los beneficios del turismu cultural que pel añu, y depues d’esti, descubrió munches vegaes per primer vez la esistencia d’un sitiu y una ufierta cultural distinguida y valiosa.

Los dos años de preparación signifiquen pal Principáu la oportunidá de planificar, por primer vegada na nuesa historia, l’acción cultural de l’Asturies Central y profesionalizar más y meyor la xestión de los equipamientos que nos años próximos van articular les polítiques d’espardimientu patrimonial, innovación creativa y turismu cultural na nuesa Comunidá. Y planificar a mediu y llargu plazu l’acción cultural, con toles ventayes competitives qu’ello conlleva.