El FICX reivindícase nel so 60 aniversariu como puntu d’alcuentru col cine independiente

La ciudá de Xixón prepárase para volver ser, nos próximos díes, esi puntu d’alcuentru nel que cineastes y públicu déxense abasnar pola gran fola del cine independiente del FICX, el 60 Festival Internacional de Cine de Xixón.

Van ser nueve díes nos qu’afayar les miraes de ceadores y ceadores de tol mundu al traviés de más de 250 proyecciones, y d’esfrutar cola visita de más d’un centenar de personalidaes del cine del nuesu tiempu que van presentar les sos nueves producciones, van parolar col públicu tres los pases y van protagonizar les actividaes paraleles d’esta edición.

Precisamente la pieza cinematográfica que va sirvir como cabecera del 60 FICX, Cinetract, roblada pola cineasta asturiana Elisa Cepedal, treslládanos a la Sablera de San Llorienzo como llugar representativu de la ciudá onde atopase y onde contemplar les foles que lleguen. Per segundu añu consecutivu, el FICX emplega como cabecera una obra audiovisual realizada por un cineasta asturianu, iniciativa qu’inauguró en 2021 la pieza Folaxe, de Ramón Lluis Bande.