El Día de la Ruta de la Plata traxo con elli’l Pasaporte Romanu

Cada 18 de setiembre, dende 2014, celébrase’l Día de la Ruta Vía de la Plata, en tolos conceyos qu’integren la rede de cooperación, con un programa d’actividaes en cada localidá. El Día de la Ruta Vía de la Plata celébrase pa conmemorar una fecha simbólica: la nacencia de Marcu Ulpio Traxano, el primer emperador romanu nacíu en Hispania.

En conmemoración del día de la Ruta de la Plata pudo consiguise’l “Pasaporte romanu”, una tarxeta que podrá sellase, ente’l 18 de setiembre y el 18 d’ochobre, nos trés yacimientos romanos de la ciudá: El Parque Arqueolóxicu-Natural del la Campa Torres, el Muséu de les Termes Romanes de Campo Valdés y el Muséu de la Villa Romana de Veranes. Una vegada selláu, puede trocase por un regalu nos puntos d’información turística Infogijón. Amás, quien lo apurra selláu va participar nel sortéu de 2 abonos pal Festival Internacional de Cine de Xixón, entraes pa espectáculos de la seronda cultural y bono Xixón Llambión.