El Conceyu y la Cámara de Comerciu d’Uviéu roblen un conveniu pa fomentar el Camín de Santiago

Unes 150 persones van poder participar nesta iniciativa que pa alendar emprendimientu alrodiu del Camín de Santiago cofinancia’l consistoriu uvieín y la fundación Incyde y qu’abre esti 18 de setiembre’l plazu d’inscripción pa participar nos dos primeros programes que se van desenvolver na primera quincena d’ochobre.

El conceyal d’Emplegu, Rubén Rosón, y el presidente de la Cámara de Comerciu d’Uviéu, Fernando Fernández-Kelly, roblaron la selmana pasada un conveniu de collaboración pa poner en marcha’l programa “Entamar en turismu. Un sector con presente y futuru” col que pretende fomentase el emprendimiento venceyáu al Camín de Santiago pol so pasu per Asturies.

El proyectu, financiáu con 180 mil euros (la fundación Incyde va apurrir el 80% y el Consistoriu’l 20%), va beneficiar a unos 150 entamadores n’Uviéu. Según resaltó’l conceyal, esta iniciativa amás de desaniciar el paru nel conceyu, “va suplir necesidaes perentorias de los pelegrinos que n’Asturies echen en falta otros servicios de los que sí disponen n’otres zones nes que’l Camín de Santiago ta más esplotáu” como pueden ser tresporte, conseña, recuperación d’oxetos perdíos o atención al ciclista.

El programa inclúi 4 programes de Xeneración de Conocimientu de 300 hores de formación nos que se van tratar temes xurídiques y fiscales, transversalidad  turística, innovación na comercialización y sostenibilidá económica, financiera y medioambiental. Los dos primeros programes van desenvolver na primera quincena d’ochobre. El plazu d’inscripción va empezar esti 18 de setiembre y pue consultase tola información na siguiente web: www.emprendeconlacamara.com