El Conceyu d’Uviéu impulsa la ellaboración del nuevu Plan d’Igualdá del conceyu

El nuevu Conseyu d’Igualdá d’Uviéu, constituyíu esta selmana pasada, va definir antes de final d’añu les acciones que va incluyir el documentu con un puntu de partida que va ser l’estudiu de diagnósticu de la situación de muyeres y homes nel conceyu.

El Conceyu d’Uviéu va empezar la ellaboración del nuevu Plan d’Igualdá d’Oportunidaes ente muyeres y homes del conceyu 2017-2019, que tien prevista la so aprobación y puesta en marcha a principios del próximu añu. La constitución esta selmana pasada del nuevu Conseyu d’Igualdá d’Uviéu, más abiertu y cola participación d’una ventena d’asociaciones, ye’l primer pasu pa definir les acciones en materia d’igualdá. Como puntu de partida, ellaboróse un estudiu de diagnósticu de la situación de muyeres y homes nel conceyu.

La nueva composición del Conseyu d’Igualdá da respuesta a la necesidá de reactivar esti órganu consultivu y articular les polítiques destinaes a la muyer, qu’escarecen d’un documentu de sofitu desque en 2012 expiró l’anterior plan d’igualdá. L’órganu cunta con un nuevu reglamentu, qu’amplía’l númberu de miembros ya incorpora a asociaciones y colectivos en defensa de los derechos de la muyer, amás de representantes políticos y sindicales.

El Conseyu va poner en marcha una serie de meses técniques que van trabayar hasta finales d’añu na ellaboración y presentación de propuestes pal nuevu Plan d’Igualdá d’Oportunidaes. L’oxetivu de la conceyalía d’Atención a les Persones ya Igualdá, que dirixe Marisa Ponga, ye qu’esti documentu sía lo más participativo posible y que ente a valir a principios del próximu añu.  El plan tien como finalidá convertise nuna ferramienta que dea respuesta a los desequilibrios esistentes nel conceyu en relación a la igualdá ente homes y muyeres.