El claustru de la Universidá reclama una baxada progresiva de les tases de matrícula

La inmensa mayoría de los 270 miembros del claustru de la Universidá d’Uviéu sofitaron esta selmana pasada reclamar una baxada progresiva de los precios públicos de primera y socesives matrícules y la equiparación de les tases de grau y máster.

La propuesta, que nun tuvo votos en contra y solo catorce astenciones, plantegaronla 28 claustrales del colectivu d’estudiantes. María Burgos y Alba Villa, encargaes de defendela, encamentaron a los miembros del máximu órganu de representación de la comunidá universitaria a asitiase públicamente a favor del planteamientu que los estudiantes treslladaron yá esti cursu a la Dirección Xeneral d’Universidaes de llograr una rebaxa del 43% nos precios de matrícula pal cursu 2020-2021. «Gustaríanos que nun fueren una torga pa competir coles comunidaes vecines», sorrayó’l rector.

Santiago García Granda, que repasó nel so informe les, al so xuiciu, meyores desenvueltes pa los colectivos d’estudiantes, personal docente ya investigador y d’alministración y servicios, tamién avanzó que la institución académica va poder cuntar el próximu añu con una cantidá daqué penriba los 200 millones del actual exerciciu. D’esta cantidá, daqué más de 131 millones va venir de les arques rexonales. Asina, el Principáu va apurrir 126 millones vía financiamientu ordinariu, otru millón correspondiente al financiamientu por oxetivos y 1,6 del plan d’inversiones.