El centru Sestaferia celebra una folixa antroxera

Esti llunes 20 de Febreru tendrá llugar nel Centru Social Sestaferia de Xixón, asitiáu na cai Joaquín Alonso Bonet, 2 la “II Folixa Antroxera: Diagonal Asturies vs Glayíu” organizada por dambos medios asturianos de comunicación alternativa. Nesta folixa d’antroxu en sofitu de los medios alternativos habrá presencia de dellos pinchadiscos como El Corrector, Dj Dedé y Dr Xicu. Anuncien ambiente xuvenil, comida y bébora a precios populares, asina como imprescindible un “disfraz recicláu FTM -Failu tu mesmu/a-“.

Glayíu ye una ferramienta de comunicación na rede a dimposición de los coleutivos y persones destinada a esparder información alternativa y servir como “puntu d’alcuentru de la disidencia asturiana”. Pel so lláu, Diagonal Asturies ye un periódicu d’información, alderique, investigación y analís fechu de mena asamblearia y autoxestionaria editáu a nivel estatal, y que cunta con una edición trismestral propia p’Asturies.