El 95 % del alumnáu musulmano de Primaria y ESO nun tien clase de relixón

El 95 % del alumnáu musulmano nun tien clase de relixón n’España, porcentaxe igual al de profesores d’esta materia que s’atopa desemplegáu.

Señalalo l’Estudiu demográficu de la población musulmana con datos del censu de ciudadanos musulmanes nel nuesu país d’avientu de 2016, y que foi ellaboráu pola Unión de Comunidaes Islámiques d’España (Ucide). Según l’estudiu, na actualidá solo s’atiende una demanda básica” de clases de relixón musulmana en centros públicos de Primaria n’Andalucía, Aragón, Canaries, Castiella y Llión, País Vascu, Madrid, y en Ceuta y Melilla.

“Queden alumnos musulmanes inda ensin clase por toa España y profesores de relixón islámica nel desemplegu”, aprofió Ucide, que detalló que pa esti cursu contratáronse siete nuevos profesores de relixón musulmana. Pasáronse de 48 profesores de la citada materia nel cursu 2015-16 a 55 pa esti 2016-17. Dende’l cursu 2000-01, cuando había cuatro profesor, foise xubiendo amodo la cifra de profesores de relixón musulmana nos años socesivos hasta algamar los 46 en 2009, cifra que se caltuvo hasta’l 2014-15 cuando llegó a los 47.

El documentu recordó qu’en 1996 aprobóse’l conteníu o currículu de les clases d’enseñanza relixosa islámica y el conveniu pa la contratación de profesores pa impartir l’asignatura. Pa Ucide, hai demanda d’alumnáu y, por tanto, de contratación de profesoráu en Baleares, Cataluña, La Rioxa, Murcia, Comunidad Valenciana y en Castiella-La Mancha.

En total, hai 290.110 alumnos musulmanes o destinatarios de clase de relixón musulmana y, d’ellos, el 39,46 % tienen nacionalidá española. Per otru llau, aprosimao’l 4 % de la población total d’habitantes d’España ye musulmana: el 42 % ye español ente que el 58% ye inmigrante (39 % marroquinos y 19 % d’otra nacionalidá).