Educación investiga la filtración de documentos sobro les oposiciones

La Conseyería d’Educación publicó na mañana del llunes una nota d’alvertencia por mor de que taba circulando ente los opositores documentación ‘penerada’. Trátase, al paecer, d’un calendariu de les pruebes, una propuesta qu’ellaborara la conseyería y que treslladara a los presidentes de los tribunales.

“Denunciada a esta conseyería la divulgación de documentación de trabayu internu relativa al procedimientu selectivu de forma indebida, comunícase a toles persones aspirantes presentaes al procedimientu selectivu que la única documentación oficial ye la publicada pol órganu convocante al traviés d’esti portal, nun teniendo de ser atendida cualesquier otra información que nun sía publicada nin roblada por dichu órganu”. Asina salía al pasu la Conseyería na mentada nota.

El calendariu nun ye oficial y quiciabes yá nun sía’l definitivu: “Rogamos acepten les sides presentaes por esti órganu que, sía que non, va empecipiar les xestiones oportunes pa evitar futures divulgaciones indebíes». Amás, ye posible que s’investigue de quién procedió la filtración. Una y bones eses midíes van adoptar ensin perxuiciu de los procedimientos que se repare necesariu empecipiar pa depurar les responsabilidaes que correspuendan”, anuncia la conseyería na so nota.

Hai más de 6.000 persones (6.052) inscrites na convocatoria d’empléu públicu d’Educación d’anguaño, na que se xueguen’ 725 places del cuerpu de maestros. La relación d’almitíos y escluyíos yá foi publicada. Pa Infantil, 1.702 aspirantes y 209 puestos; n’Inglés, 802 y 102; Educación Física, 615 y 65; Música, 275 y 46; Pedagoxía Terapéutica, 731 y 102; Audición y Llinguaxe, 290 y 37; y en Primaria, 1.637 y 164.

Per otru llau, la Conseyería d’Educación publicó tamién la llista d’almitíos y escluyíos na nueva convocatoria del Plan d’Evaluación Docente. En total, 361 profesores fueron incluyíos nel procesu de la carrera profesional (siempres que lleven cinco años d’esperiencia) y que-yos dexa cobrar un plus económicu.