Un actu consolidáu pero anováu fizo tremar el Campoamor otra vuelta nel Día de les Lletres

L’actu col que l’Academia de la Llingua celebra cada primer vienres de mayu el Día de Les Lletres tenía esti añu novedaes que lu camudaron otra vuelta nel finxu d’un procesu que paez remocicar de la mano de la sociedá civil, agora de nuevu enfotada n’algamar la Oficialidá: un discursu más sociocultural que políticu, que mira más pal futuru que pal presente, siempres murniu n’Asturies y n’asturianu, y el reconocimientu lliterariu a una xeneración na persona de Xuan Bello.

Les novedaes adelantoles la presidenta de la institución, Ana Cano, díes enantes na rueda de prensa na que davezu se presenta l’actu y afitolo coles sos primere pallabres del so discursu: per primera vegada en dellos años, la inevitable crítica a la situación llingüística, política y cultural, del añu últimu nun yera’l centru del actu institucional cimeru de la sociedá civil que lleva cásique cuatro décades pidiendo daqué de xusticia, normalizar la situación de la llingua asturiana como manda la Constitución, facela oficial.

L’atención cimera nel discursu institucional del Teatru Campoamor foi pales muyeres que lleven aportando a lo llargo de tola so hestoria la meyor narrativa, poesía, periodismu o ensayu a les lletres asturianes. Y la reconocencia al esfuerzu por da-y puxu a esta llingua de nós d’una xeneración, representada nun nome propiu, Xuan Bello, que recibía el Premiu Nacional de Lliteratura na ceremonia y que tuvo un emotivu discursu nel que fizo alcordanza de tolos finxos que lu llevaron a escribir y a facelo col ésitu qu’agora se-y reconocía.

Coles lluces apagaes y el focu de lluz hacia l’escenariu onde taben Mari Luz Cristóbal Caunedo y Bárbara González-Quevedo Pedrayes la pieza “Caleyucu” abría esti actu institucional que tuvo na gaita de Lidia García y na “Marcha d’Agapito Pombo” la banda sonora hasta que tolos miembros de l’ALLA xubieron al escenariu cola marcha de gaita de fondu. Darréu Sonia Avellaneda y Próspero Morán abrieron l’actu agradeciendo en nome de l’Academia de la Llingua la presencia d’autoridaes, representantes d’estremaes organizaciones y asociaciones y de personalidaes de la vida política, sindical, universitaria y cultural del País. Diéronse-yos les gracies pola importancia simbólica de la so presencia y pola actitú de consideración y respetu qu’amuesen hacia la llingua que compartimos como asturianos y asturianes, agradeciendo, a lo cabero y mui fondamente, al Conceyu d’Uviéu y a la so Fundación Municipal de Cultura la so collaboración na organización y espardimientu del actu, daqué bien sinificativo nun añu nel que les relaciones col Gobiernu asturianu nun pasaron precisamente pol so meyor momentu.

Y darréu, el Secretariu de la Institución fizo llectura del Alcuerdu del Xuráu del Premiu Nacional de LLiteratura Asturiana na so primer edición qu’apauto concede-ylu a Xuan Bello, al que se-y invitó a xubir al escenariu pa depués imponé-y el Medayón conmemorativu obra d’Adolfo Manzano ya invitalu a qu’ufriera les sos pallabres d’aceutación.

Tres de les pallabres de Xuan Bello, aplaudíes enforma pol públicu que llenaba dafechu’l Teatru Campoamor, la Presidenta de l’Academia ufrió’l so discursu institucional pa dar pasu a Sonia Avelllaneda y Próspero Morán que, como ye vezu nel actu, recitaron una pequeña esbilla de poemes d’estremaes autores qu’apaecen espublizaos na revista “Lliteratura”, númberu 33, qu’esti vienres se presentaba. Los poemes de Marta Mori, Sabela Fernández, Vanessa Gutiérrez, María José Fraga, Susana Sela. Irma González-Quevedo y Marisa López Díz, resonaron nel Teatru Campoamor enantes de que los académicos y el premiáu abandonaren l’escenariu pa dar pasu a l’actuación musical.

Una actuación musical la d’esti añu qu’amosó l’interés del públicu y afitó’l calter anovador del actua como dexó a les clares el públicu colos ap’lausos que brindó yá al entamu del conciertu. L’Asociación Música Tradicional MUYERES, presentaba una adautación musical y escénica del so aplaudíu espectáculu País malva, una producción de Fernando Ornosa, con Direición Escénica de Borja Roces, onde participen les escritores Esther García, Sofía Castañón, Leticia González, Tania Rodríguez, Cecilia Braña, Mavisa Miravalles, Marco Antonio Cuiñas, María Llatores y Marina Pangua.  Una versión más curtia pero non menos lluminosa de País malva, onde los testos yeren de Leticia González, Sofía Castañón, María Llatores y Marco Antonio Cuiñas.

Y ente l’aplausu zarráu del públicu, les componentes de l’Asociación Música Tradicional MUYERES y la gaitera Lidia García interpretaron l’Asturies Patria querida que muncha xente cantó al tiempu zarrando colos tradicionales glayíos de Puxa Asturies un actu qu’abre la puerte a un añu con más esperanza que dengún de los últimos.