Denuncien la castellanización de la imaxe de l’Axencia de Cooperación al Desarrollu

La Xunta pola Defensa de la Llingua Asturiana (XDLA) denuncia la castellanización de la imaxe de la que fuere Axencia Asturiana de Cooperación al Desarrollu y l’ausencia de versión n’asturianu na web agendaculturalasturias.es, que ta acabante inaugurar la Conseyería de Cultura. La XDLA diz “plasmar énte la castellanización de la imaxe de l’Axencia de Cooperación, dependiente de la Conseyería de Bienestar y Vivienda, que ta entamando a difundir nes sos comunicaciones un llogotipu nuevu en castellán cuando llevaba más d’una década cola so denomación n’asturianu”.

Espliquen que vienen denunciando, “por desgracia, les muestres d’usu públicu del asturianu nes Conseyeríes respuenden a voluntaes polítiques individuales y concretes, y non a planes claros, tresversales y sistemáticos de normalización” y denuncien que “cuando llega un responsable al que nun-y da más la recuperación del asturianu (como ye’l casu), esta llingua, ensin más, desapaez de la Conseyería”.

De la mesma manera, recuerden, “vuelve a sorprender negativamente que la llingua y la toponimia asturiana tean ausentes de la web agendaculturalasturias.es, acabante estrenar y xestionada pola Conseyería d’Educación y Cultura, y supuestamente dedicada a presentar la ufierta d’actividaes culturales”. Pa la Xunta “nun val agora la sida de la falta de presupuestu, disponiendo como dispón esa Conseyería d’un Serviciu de Política Llingüística pa traducir los conteníos, nin ye posible que desconozan les formes oficiales de los topónimos qu’ellos mesmos aprobaron nel Boletín Oficial del Principáu d’Asturies hai años y que na mentada web nun se respeten”.

Dende la XDLA esixen “la rectificación inmediata d’entrambes dos conseyeríes y l’usu públicu del asturianu como muestra del compromisu real cola so recuperación y normalización”. Recuerden que “nun ye abondo con dicilo: hai que facelo”.