Denuncien incumplimientos nel usu de la toponimia en carreteres autonómiques

Iniciativa pol Asturianu denunció güei que la Dirección Xeneral de Carreteres del Gobiernu d’Asturies ta acabante instalar nueves señales viales colos nomes de Lieres, Nava, L’Infiestu y Les Arriondes nel enllaz de l’autovía A-8. Según espliquen dende la organización “estes señales usen los topónimos yá derogaos “Infiesto” y “Arriondas”, en cuenta de los únicos oficiales y d’obligáu usu pola alministración: L’Infiestu y Les Arriondes”, lo que califiquen como “un nuevu ataque a la recuperación y normalización de la toponimia tradicional asturiana”.

Dende Iniciativa pol Asturianu afirmen tar sorprendíos, pues esti usu incorrectu de la toponimia “llega dempués de que la Conseyera de Cultura reclamara al Ministeriu de Fomentu l’usu d’esta toponimia qu’agora vemos que nun cumple siempres el so propiu Gobiernu”, anque reconocen que “nes carreteres nueves el Gobiernu d’Asturies vien cumpliendo col usu de la toponimia oficial”, esti ye un exemplu de lo qu’Iniciativa pol Asturianu califica como “inalmisible pasu atrás”.

Por ello solicitaron al traviés de carta a la Dirección Xeneral de Carreteres el cambiu inmediatu d’estes señales, “esperando que se trate namás d’un erru temporal”, al mesmu tiempu que se-y solicitó, tamién vía postal, a los alcades de Piloña y Parres, Carmen Barrera y Marcos Gutiérrez Escandón “que reclamen dende les sos instituciones l’usu de los nomes de llugar que ficieron oficiales los propios plenos de dambos conceyos”.