Cultura va dedicar un 6% más a la promoción del asturianu

La Conseyería de Cultura, Política Llingüística y Turismu, Berta Piñán, tien previsto destinar l’añu entrante más de 2,2 millones d’euros (un 6 per cientu más que nesti) a la promoción del asturianu  según reflexa’l presupuestu previstu pa esti departamentu en 2022, que se va amontar más d’un 16 per cientu y va algamar los 69,7 millones.

Les cuentes fueron presentaes pola titular de Cultura, Berta Piñán énte la Comisión de Facienda del parlamentu asturianu, intervención que llevó a cabu n’asturianu y qu’amenó la quexa del voceru de Vox, Ignacio Blanco.

La Conseyera de Cultura dixo que va apostar pola transversalidad en política llingüística, que se que va llevar a cabu un reaxuste presupuestariu y que la Sociedá Pública de Xestión va pasar a faese cargu del circuitu de “Autores nel Camín” ente otres actividaes en asturianu.

La Dirección Xeneral de Política Llingüística va impulsar amás una nueva llínea nueva d’ayudes, dotada con 86.000 euros, pa la Federación Asturiana de Conseyos (FACC), pa que desenvuelva’l Proyectu Faladera de formación d’asturianu y eonaviego non reglada p’adultos, y va apurrir a l’Academia de la Llingua Asturiana 240.000 euros, 10.000 más que nesti exerciciu.

Ente otres coses, supimos tamién que’l Prerrománicu va disponer d’una partida de 500.000 euros que van dexar acometer la meyora de les cubiertes de San Salvador de Valdediós y Santa María de Bendones, afaer l’accesu piatonal a los monumentos del Naranco, llimpiar la fonte de Foncalada y correxir mugores na Cámara Santa.
A los xacimientos arqueolóxicos con arte rupestre paleolíticu destínense 100.000 euros pa intervenciones de caltenimientu y otros 110.000 a la meyora de la cubierta d’accesu a Bustillo.

El presupuestu de la Dirección Xeneral de Cultura va xorrecer un 9,1% y va dedicar 1,8 millones en 2022 a seis nueves llínees d’ayudes empobinaes a les artes escéniques y visuales, la música, la edición, el cine audiovisual y el videoxuegu, dotaes con 700.000 euros.

A programar actividaes por tol territoriu al traviés de los circuitos de Asturies, Cultura en Rede, va conseñar otru millón, al que se suma la partida pa iniciatives impulsaes por asociaciones y entidaes ensin ánimu d’arriquecimientu, que va cuntar con 100.000 euros, según detalló Piñán.

L’aportación al Muséu de la Sidra van pasar de 8.640 a 30.000 euros nel añu en que se va presentar énte la Unesco la candidatura a Patrimoniu Mundial Inmaterial de la cultura sidrera, y el de Belles Artes tamién va disponer d’una partida nueva, dotada con 70.000, p’alquisición d’obra. Tamién se van dedicar 200.000 euros a un programa cultural en redol al 1.300 aniversariu de la batalla de Cuadonga, que va incluyir xuna gran esposición nel Muséu Arqueolóxicu, y l’inauguración del Camín de los santuarios, ente Uviéu-Cuadonga y Llébana.